Hasi dira gure herrietako bestak eta berriz ere herri guzia elkartuko da plazetan, karriketan, ostatuetan, dantzaldietan… bestan azken finean. Urtea hausten duten bestek elkartzen gaituzte herrian, elkarrekin gozatzeko. Zer da ba besta, hori baino? Nola daiteke besta, denendako ez bada? Herritar guziendako ez bada? 



Dantzak ditugu gure kulturaren ezaugarri garrantzitsuenetakoa eta ongi pasatzeko ezinbertzekoak. Jendartearen ispilu eta bozgorailu izaten da, eta Euskal Herriko txoko guzietan bezala, baztandarrok ere horrela erakusten dugu geure burua Baztanen eta munduan. Baztan dantzaria da. 



Ez gara aspertuko tradizioak maite ditugula errateaz, tradizio eta ohiturak mantendu nahi ditugula, eta ez gara aspertuko errateaz etengabeko aldaketekin maite ditugula gure tradizioak eta gure jendartea. Aldaketek biziraupena bermatzearen aldekoak izan behar dute, etorkizuna izan nahi badute. Tradizioek irautea nahi badugu, aldaketa ezinbertzekoa da. Aldaketa baita aldaezina den gauza bakarra.



Mutil-dantzen biziraupena nahi dugu, mutil-dantzak aldaketa horien lekuko izan daitezen nahi dugu. Denen artean erabakitzen dugu gure herriko plazetan nolako aldaketak egin nahi ditugun: bazterketaren aitzinean isiltasun konplizea edo salaketa? Plaza parekide eta anitzak bulkatu, edo indarkeria sexistaren oinarri diren zapalketa baztertzaileekin segitu? Bazterketa edo elkartasuna? Aniztasuna edo elitismoa? Zein da baztandarrek ispilurat begiratzen dugularik ikusi nahi dugun irudia? 



Plazara Dantzara-n argi dugu galdera horiek erantzun bakarra dutela eta, urtero bezala, plazak eta bestak parekideak, aniztasunean oinarrituak, beteak eta alaiak nahi ditugula. Nork ez? Herritarren hankarterat begiratu gabe, aske dantzatzeko oztoporik ez duten plazak eta bestak nahi ditugu. Dantzan gozatzeko plazak, epaiketa publikorik gabeko plazak, denendako plazak. 



Dantzatzeko tenorea da, erabakitzeko tenorea da eta ispiluan begiratzeko tenorea da! Goza ditzagun gure herrietako bestak, munduari eta geure buruari besta parekideak maite ditugula erakutsiz.