Bilboko itsasadarra zeharkatu zuen itsasontzi solidarioaren arrakastaren ondoren, «Biden, entzun mundua: Unblock Cuba!» lelo berarekin, 70 elkarte inguruk lau elkarretaratze egingo dituzte aldi berean, Bilbon, Donostian, Gasteizen eta Iruñean ekainaren 23an, Nazio Batuen Batzar Nagusian egingo den bozketarekin batera. Egun horretan Kubaren blokeoa amaitzeko eskatuko diete AEBei, 29. aldiz.

«AEBen blokeoak, azken lau urteetan 242 zigor berrirekin indartuta, inoiz ez bezalako eragina izan du pandemiaren ondorioz bere diru-iturriak murriztu dituen eta, ondorioz, hornikuntzarik gabeko egoera larrian dagoen herrialde baten bizi baldintzetan», adierazi du Euskadi-Cuba elkarteak. Erakunde deitzaileek dei egin diote euskal gizarteari, bere espektro politiko zabalean, ekitaldi hauetan parte hartzeko.

Deialdia egin duten erakundeen artean daude Ahal Dugu-Podemos, Alternatiba, EH Bildu, EK-PCPE, EKB, ELAK-PCTE, Ernai, Ezker Anitza-IU, EA, GK, PCE-EPK eta Sortu alderdi politikoak, CCOO, EHNE Bizkaia, ELA, ESK, Hiru, LAB, Steilas eta UGT sindikatuak; Ikama gazte mugimendua eta Ikasle Ekintza, eta Acesma, Euskadi-Cuba, Desembarco del Granma eta Sierra Maestra elkarteak, eta beste 40 bat talde, hala nola Ongi Etorri Errefuxiatuak, Mundubat eta SOS Racismo, beste askoren artean.

Erakunde hauek Joe Bidenen Gobernuari eskatu diote Nazio Batuen 28. ebazpena ez ezik, bere hauteslegoaren mandatuak ere bete ditzala; izan ere, «Donald Trumpek Kubako herriari egindako politika itogarria» iraultzea agindu zion.

Horretarako, debekuak kentzen hasteko eskatu diote, hala nola, ondasunak bidaltzeari, hegaldiei eta bisak emateari ezarritakoak; Helms–Burton Legearen aplikazioa atzera bota dezala eta Kuba «herrialde terroristen» zerrendatik ken dezala. Obamaren Administrazioarekin hezkuntza, kultura edo zientzia arloan sinatutako 22 hitzarmenak berreskuratzeko ere galdegin diote Estatu Batuetako buruzagiari.

«Egia da blokeoaren abolizioa ez dela presidentearen erabakia, AEBetako Kongresuaren lege bat eskatzen du. Baina, aukera historiko gisa, gaur egun Alderdi Demokrata da nagusi», diote antolatzaileek. Hala ere, aldebiko elkarrizketa berriz hasteari dagokionez, adierazi dute zentzu horretan edozein urrats eragoztea egungo «Kubaren aurkako presio politiko eta mediatiko bortitzaren arrazoia dela», Kubako ultraeskuindar amerikarretatik hasi eta Europan dituen aliantzetara.

Gainera, Kubak beste herri batzuekin duen elkartasuna gogoratu dute: azken urtean, 57 mediku-brigada bidali ditu, bost mila kooperanterekin, gehienak emakumeak, munduko 40 estatura.