Schijndel taldeko Mijntje Geurts txirrindulari herbeheretarrak jantzi du Bizkaikoloreak lasterketaren txapela eta azkeneko maillot zuria, Iurretan hasi eta amaitu den bigarren eta azken etapan erakustaldi bat emanda nagusituta. Lehen etapan esprintean hirugarrena izan ostean, lasterketa erabaki duen bigarrenean aldapan gora are hobeto moldatzen dela erakutsi du etorkizun oparoko txirrindulari honek eta azken kilometro gogorretan alde eginda, bakarrik heldu da helmugara, 25 segundotako aldearekin. Van der Meiden herrikide eta taldekidea izan da bigarren eta Julia Kopecky txekiarra hirugarren.

Bezperan onenen artean alde handirik egin ez zenez, lasterketa erritmo bizian irten da hasiera-hasieratik eta erritmo bizi honek ez du inolako ihesaldirik baimendu. Proba azken kilometro gogorretan erabakitzea espero bazen ere, laugarren mailako Urrunineko igoera motz baino pikoan hasi da tropela bere lehen aleak galtzen, amaierarako 42 kilometro faltan. 13 txirrindulariz osatutako talde batek egin du hor aurrera, eta bertan ez du sartzerik izan Lucia Ruiz liderrak. Laguntza gutxi izan du Abadiñoko garaileak, berak eraman behar izan du jazarpenaren ardura eta ia minutu bateko aldea galdu du lehen mendatea jaitsi eta gutxira.

Egoera honetan heldu da lasterketa San Trokazeko –3. maila– lehen maldetara eta hor eman zaio hasiera azken garaipena erabaki duen 20 kilometro oso gogorretako tarteari. Argi zegoen garaipena aurreko talde horretan zegoela azken garaipena eta erasoak etengabekoak izan dira. Eguneko eta itzuli osoko mendaterik gogorrena izan den bigarren mailako Duñan gora Mijntje Geurts izan da indartsuena eta ondo merezitako garaipena eskuratu du Iurretako helmugan.

Sailkapenak:

2. etapa: Iurreta-Iurreta 72km

1.- Mijntje Geurts (Schijndel)        2:03.02
2.- A. Van der Meiden (Schijndel)   25era
3.- Julia Kopecky (Restore)            d.b.
4.- Rosita Rejnhout (Restore)         d.b.
5.- Eglantine Rayer (France)          31ra

Sailkapen nagusia

1.- Mijntje Geurts (Schijndel)        3:27.56
2.- A. Van der Meiden (Schijndel)  35era
3.- Julia Kopecky (Restore)            d.b.
4.- Eglantine Rayer (France)         42ra
5.- Rosita Rejnhout (Restore)        43ra