Kirol psikologiaren aplikazioa

Trebetasun psikologikoek eragin handia dute kirol-errendimenduan eta ongizatean. Horregatik, atleten garapenean geroz eta garrantzi handiagoa duen arloa da kirol psikologia. Baina ez dago kirolari profesionala izan beharrik trebetasun psikologikoak lantzeko eta praktikan jartzeko. Jarraian, kirol esparruan gehien erabili ohi diren teknika psikologiko batzuk aipatuko ditugu, nork bere kasuan aplikatu ahal izateko:

HELBURUAK EZARTZEA

Teknika honen bidez, zer nahi den (helburuak) identifikatzea eta hori lortzeko egin behar diren ekintzak zehazten dira. Teknika horren onuren artean motibazioa eta konpromisoa handitzea, kontzentrazioa eta autokonfiantza hobetzea eta antsietatea murriztea nabarmentzen dira.

ERLAXAZIOA

Erlaxazioa trebetasun psikologiko oso ezaguna eta aztertua da, estresa gutxitzen duelako eta errekuperazio fisikoa errazten duelako. Kirolean, atletaren aktibazio-maila kontrolatzeko ere erabiltzen da. Helburua egoera bakoitzerako bilatzen den aktibazio-maila kontrolatzea da.

BISUALIZAZIOA

Teknika honen bidez, kirolariak biziko duen egoera ahalik eta zehatzen irudikatzea bilatzen da (ingurua, zentzumenak, aurkariak…), bizipen mental horiek entsegu edo simulazio gisa funtziona dezaten. Esan genezake bistaratzea egingo dugunaren simulazio mentala dela.

ATENTZIOA

Trebetasun psikologiko honek gure arreta bideratzea ahalbidetzen digu, eta hala erabakiak hartzea optimizatu eta distraktoreak gutxitzen dira. Teknikarik erabiliena ekintza jakin baten aurretik hitz gakoak edo erritualak erabiltzea da. Adibidez, bularrean kolpe kopuru zehatz bat jotzea proba bati aurre egin aurretik.

AUTOHIZKETA

Barne-komunikazioa entrenamenduetan eta lehiaketan erabiltzen da, kirolariak bere pentsamenduak kontrolatzen ikas dezan. Helburua gure pentsamenduez kontziente izatea da, horiek moldatzeko eta lortu nahi dugun egoera potentziatuko duen perspektiba hartzeko.

Amaitzeko, bakoitzarentzat optimoenak diren teknikak aplikatzeko modurik onena kirol psikologian aditua den profesional batengana jotzea izango litzateke, baina bien bitartean, saiatu zeuen potentzial osoa ateratzen!