Etorkin adingabeak banatzeko akordio zehatzik gabe, Presidenteen Konferentzian

Pradales lehendakariak etorkin adingabeen banaketa puntuala eta apartekoa proposatu zuen atzo Erkidegoetako Presidenteen Konferentzian. Bilera akordio zehatzik gabe amaitu zen.

Santanderren atzo egindako autonomia erkidegoetako Presidenteen Konferentzia akordio zehatzik gabe amaitu zen, Pedro Sanchez gobernuburu espainiarrak eta erkidegoetako presidenteek bost orduz hitz egin ondoren, etxebizitzaren, osasunaren, erkidegoen finantzaketaren eta etorkin adingabeen banaketaren inguruan.

Atzerritarren legea erreformatzeko negoziazioekin, Fernando Clavijo Kanarietako presidenteak eta Imanol Pradales EAEko lehendakariak proposatu zuten adingabe migratzaileen banaketa «puntuala eta apartekoa» egitea hiru hilabeteko epean, bost adierazle objektibotan oinarrituta, baina erantzun zehatzik gabe ere joan ziren.

Hala ere, biek nabarmendu zuten ez zela aurrez aurreko arbuiorik izan adingabe horiek banaketa orekatua lortzeko ekimenaren aurrean, eta horrek «itxaropenerako bidea» irekitzen duela, Pradalesen hitzetan.

Pradalesek akordio zehatzik ez dagoela deitoratu zuen. Bilera «formetan zuzena izan da, baina edukian ez da aurrera egin», eta hori alderdien arteko «lehia politikoarekin» lotu zuen. EAEn eta Kanariar Uharteen migrazio proposamen bateratuari buruz azaldu zuenez, «espektatibak sortu ditu eta harrera ona izan du zenbait alderditako presidente autonomikoen aldetik». Zehaztu zuenez, harrera on hori egon da gobernu espainol, katalan eta aragoiarraren aldetik.

Hitzorduan lehendakariak planteatu zuen EAE «iparraldeko mugatzat» hartzea eta, horregatik, baliabide gehiago izatea migratzaileei arreta duina emateko. Baina Sanchezen Gobernuak ez zuen inolako erantzunik eman.

Bestalde, Maria Chivite lehendakariak bidaiderik gabeko adingabe migratzaileak autonomia erkidego guztietan derrigorrez eta berdintasunez banatzea proposatu zuen.