2024 IRA. 02 Gaur X urte Keanu Reeves aktore ikonikoak 60 urte beteko ditu gaur Publikoak asko maite du Keanu Reeves kanadar aktorea, sare sozialetan nabarmen islatzen denez. ‘Matrix’ eta ‘John Wick’ zinema frankizien protagonista gizon bakartia da, baina izaera apalekoa eta beti erakusten duen umore puntuagatik ikonoa bihurtu da. Egungo Hollywoodeko izarrik ospetsuenetakoa da eta gaur 60 urte bete ditu. Keanu Reeves Bartzelonako Primavera Sound-en maiatzean. (WIKIMEDIA COMMONS) Amaia Ereñaga Keanu Reeves Beiruten, Libanoko hiriburuan, jaio zen 1964ko irailaren 2an. Haurtzaro gogorra izan zuen: Aita, heroina trafikatzailea, semeak bi urte zituenean alde egin zuen eta, berriro bere bizitzan agertu zenean, artean haurra zela, tratu txarrak eman zizkion. 13 urte zituenean, agur esan zion betiko, amak seme-alabak babesteko egin zuen esfortzuagatik. Mutikoak Aspergen zuen, autismo mota bat. Familia batetik bestera bizi izan zen eta Australia, New York eta Toronto artean igaro zuen haurtzaroa Keanuk –«haurtzaro nomada» izan zuela aitortu zuen elkarrizketa batean–, baina amari beti erakutsi nahi izan dio bere esker ona eta errespetua. Gaur egun oso harreman estua dute biek. Bere hirurogeigarren urtebetetzearen bezperan, Keanu Reevesek ‘BBC News-i’ adierazi dio heriotzaren ideia egunero datorkiola burura eta maiz horretan pentsatzen duela: «Baina hori ona da. Espero dut ez nauela ezgaituko, aitzitik, daukadan energia galtzera», aipatu du. Adinaren ajeak, agian. Paradoxikoki, akzioko herioia izanik, aktorea ohituta dago pantaila handian heriotzari aurre egiten. Bere bizitza pertsonalean ere, maite izan dituen pertsonen galera latzei aurre egin behar izan zuen. Esaterako, 1993an gaindosiagatik River Phoenix aktorea eta laguna hil zitzaion. Urte batzuk geroago, 1999an, Keanu Reevesek arrakasta handia lortu zuen ‘Matrix-en’ estreinaldiarekin. Baina hura bere urterik txarrena ere izan zen. Jennifer Syme bikotekideak, zortzi hilabeteko haurdun zegoenean, haurra hilda erditu zuen. Bien arteko harremanak ezin izan zuen gainditu galera. 2001ean, Jennifer bera hil zen auto istripu batean, 28 urte zituenean. 60 urtera iristerakoan, Keanu Reevesek bikotea du eta lau film ditu aurreikusita 2025erako. Bira bat egiten ari da Ameriketako Estatu Batuetan, Dogstar rock alternatiboko bere musika bandarekin. Nobela bat idatzi du China Miéville idazlearekin batera, ‘BRZRKR’ komiki sail arrakastatsuaren jarraipena dena. Komikia salgai jarri zutenean, jarraitzaileek berehala ikusi zuten protagonista eta Keanu Reevesen arteko antzekotasuna.