Mahaia kolektiboak sukaldaritzaren tradizioa eta berrikuntza uztartu ditu ‘Sutondoan’ lanean

Mahaia sukaldarien kolektiboak ‘Sutondoan’ liburua aurkeztu du Basque Culinary Centerren, Aitor Arregi eta Roberto Ruiz chefek gidatuta. Beren plateren oinarri diren tokiko produktuak eta ekoizleak argitara atera dituzte, ekoizle txikien lana aitortu eta belaunaldi baten jakintza mantentzeko asmoz.

Mahaia kolektiboko kideek ‘Sutondoan’ liburua aurkeztu dute asteazken honetan Basque Culinary Centerren. Euskal sukaldaritzaren tradizioa eta berrikuntza lotzen dituen obra da; bertan, ekoizle txikien lana aitortzen da eta belaunaldi baten jakintza mantentzeko ahalegina egiten da, betiere ikuspegi berritzaile batetik.

Aitor Arregi, Igor Arregi, Jon Ayala, Enrique Fleischman, Ander Gonzalez, Xabi Gorrotxategi, Ismael Iglesias, Iñigo Lavado, Dani Lopez, Pablo Loureiro, Pili Manterola, Aizpea Oihaneder, Roberto Ruiz, Ruben Trincado eta Gorka Txapartegik osatzen dute Mahaia. Euskal sukaldaritzaren kalitatea eta berrikuntza hobetzen jarraitzeko lanean ari dira, konbentzituta daudelako euskal kultura eta tradizioak aktibo garrantzitsua direla produktu eta prestaketetan berritu ahal izateko. Horregatik garatu dute proiektu hau, Alvaro Bermejo kazetari eta idazlearen eta Joseba Urretabizkaia argazkilariaren lankidetzarekin.

Liburuaren aurkezpenean, Mahaia kolektiboko kide guztiak, Basque Culinary Centerreko patronatu osoa (Elena Arzak, Andoni Luis Aduriz, Hilario Arbelaitz, Pedro Subijana eta Karlos Arguiñano), hainbat elkarte gastronomiko (Ostalaritza elkartea, Jakitea, Euskal Akademia eta Fecoga) eta erakunde publikoak (Lakuako Gobernua eta Donostiako Udala) izan dira.

«Platerek sustraiak dituzte»

Mahaia kolektiboak azaldu duenez, platerek sustraiak dituzte. Hala plateren oinarri diren produktuek, nola haiek prestatzen dituzten pertsonek. «Jakintza eta zaporez, oroitzapenez, bidegurutze eta influentziaz, orainaldi eta etorkizunez, ehundutako kultur paisaia bat osatzen dute. Zalantzarik gabe, Irizar, Arzak, Subijana, Arbelaitz eta Argiñano bezalako maisuak eman dizkigun Euskal Sukaldaritza Berriak zerbaitetan asmatu bazuen, formulazio hori eguneratu eta aldi berean duala eta singularra den estilo gastronomiko bat sortzean izan zen».

Obra honetan, beren plateren oinarri diren tokiko produktuak eta ekoizleak argitara atera dituzte, irakurleei memoriaren zati hori helarazteko. «Inoiz ahotsa altxatzen ez duen alderdi umila, isiltasun horretan guztiz adierazgarria dena. Sutondoan lanaren proposamena elkarrizketa ireki horren gainean eraikitzen da, haragiak barazkiekin, sustraiak gorringoarekin edo arrainak maskorrarekin sortzen duen horren antzekoa; bertan, sukaldari bakoitzak bere kartan esanguratsuena den produktua defendatzen du. Karta hori bi eskurekin idazten da: produktuak hornitzen dituztenen jakinduria eta sukaldarien maisutasuna».

Basque Culinary Centerreko dendaren webgunean egongo da salgai obra gaurtik aurrera, store.bculinary.com-en.