Hegaluzez beteriko alberjinia

Osagaiak 4 lagunentzat
2 alberjinia, gazta birrindua. Betegarria:  tipula bat, porru bat, 2 tomate heldu, 800 g hegaluze fresko, 3 arrautza, gatza, olioa. Saltsa: tipula bat, sagar bat, 400 g tomate heldu, olioa, gatza.

Zailtasuna                                3

1. Alberjiniak luzetara ebaki. Koilara batekin barruko mamia atera, kanpoko azala apurtu gabe.
2. Zartagin batean olio ugari berotu eta azalak frijitu, bi aldeetatik. Paper baten gainera atera.
Betegarria:
1. Hegaluzeari azala eta hezurrak kendu. Urarekin 10 minutuz egosi, xukatu eta txikitu.
2. Zartagin batean txikitutako tipula eta porrua olio zurrusta batekin erregosi, su eztitan.
3. Alberjinien mamia gehitu eta erregosi.
4. Tomateei azala eta haziak kendu eta txikitu. Barazkiekin batera jarri eta erregosi.
5. Zartaginera irabiatutako arrautzak eta hegaluzea gehitu, sua amatatu eta koilararekin eragin.
Saltsa:
1. Zerrendatan moztutako tipula eta sagarra olio pixka batekin erregosi, su eztitan.
2. Barazkiak eginda daudenean, zatitutako tomatea gehitu eta 30 minutuz erregosi. Gatza bota.
3. Irabiagailuarekin nahasi eta txanotik pasatu.
Bukatzeko:
1. Azalak betegarriekin bete.
2. Azpil bat saltsarekin estali eta gainean alberjiniak jarri.
3. Gainetik gazta birrindua bota eta labe beroan sartu, 200ºC-an, 10 minutuz edo.