Encounter TV eta streaming gunea, Euskal Encounterren berritasunak

Euskal Encounterrek 22tik 25era hartuko du Barakaldoko BEC eta 30. edizioa ospatzeko bi dira ekarriko dituen berritasunak: Encounter TV plataforma eta streaming gunea, ‘Klip’ biralean lehiaketekin. Dibulgazio gune bat eta tailerrak eta hitzaldiak ere izango dira. Izena emateko epea irekita dago.

Euskal Encounter asteburu honetan izango da, hilaren 22tik 25era Barakaldoko BECen, eta aurten bi berrikuntza izango ditu: Encounter TV, «ekitaldia ikusteko modua aldatzea eragiten duen» plataforma berria, eta streaming eremua, ‘Klip’ biralenen lehiaketekin.

Hala jakinarazi du asteazken honetan Bilbon Sabino San Vicente Euskaltel Fundazioko koordinatzaile eta zuzendariak, Xabier Iturbe Euskalteleko presidentearekin eta Leyre Madariaga Lakuako Eraldaketa Digitaleko eta Ekintzailetzako zuzendariarekin batera.

Encounter TV eta streaming eremua sartuta, «pandemiaren aurretik sortu zen eta azken urteetan indar handia hartu duen fenomeno berri bati garrantzia eman nahi zaio», adierazi du San Vicentek.

Euskal Encounterrek 30. edizioa ospatuko du aurten, eta informatikako zaleen eta profesionalen topagune izango da. Hala, ekitaldiak irauten duen lau egunetan, sormen digitalarekin, hardwarearekin, software librearekin, jokoekin eta streamingarekin lotutako jarduerez gozatzeko aukera izango da, besteak beste.

Edizioak, gainera, hainbat arlotako 300 lehiaketa izango ditu, dibulgazio gune bat, «ezagutza gainerako herritarrekin partekatu ahal izateko helburuarekin sortu zena», eta hitzaldiak eta tailerrak izango dituena (ekitaldian izena emanda ez daudenentzat ere irekiak dira), eta, azkenik, kontzertuak eta emanaldiak.

Sexu erasoen aurkako protokoloa

Eraso sexisten aurrean antolakuntzak duen konpromisoa gogorarazi du San Vicentek, eta aurten eraso sexisten aurkako jarduera-protokolo bat aplikatuko dela jakinarazi du. Protokolo horrek «ziberjazarpenak kontrolatzea» eta «jokaera homofobo eta xenofoboak saihestea» ahalbidetuko du.

Ekitaldia aurrez aurreko formatura itzuliko da 2020ko online edizioaren ondoren, eta  iazkoa mugatua izan ondoren, soilik edukieraren %10arekin. Hori dela eta, 540 pertsona baino ezin izan ziren bertan bildu. 30. edizio honetan, ordea, 3.000 pertsonek eman dute izena momentuz, eta beste 2.000 lagunentzat tokia dago oraindik.