Osakidetzak dolu perinatalaren protokoloak indartuko ditu

Osakidetzak jarduera protokoloak indartuko ditu jaiotza inguruko dolua jasaten duten pertsonen arreta indartzeko. Horretarako, besteak beste, langileen prestakuntza hobetzea eta osasun zentroetan espazio konkretuak egokitzea aurreikusten da.

Osakidetzak jarduera protokoloak indartuko ditu jaiotza inguruko dolua (haurdunaldiko edozein unetan, erditzean edo erditze ostean gertatzen diren bizi galerek eragindakoa) jasaten duten pertsonen arreta indartzeko. Hala erabaki du astelehen honetan Gasteizko Parlamentuak EAJk, EH Bilduk, Elkarrekin Podemos-IUk eta PSEk sinatutako legez besteko proposamena onartuta.

PP+Cs eta Voxek ez dute ekimena sinatu, eta haien ordezkariak ere ez dira Gasteizko Ganberako Osasun Batzordean izan.

Proposamena onartu duten taldeek azpimarratu dutenez, osasun arloko profesionalek zeregin garrantzitsua dute kaltetuek dolua ahalik eta modu osasuntsuenean jasan dezaten eta, horretarako, «behar bezala prestatuta» egon behar dute.

Gogora ekarri dute Osakidetzak hainbat ekimen garatu dituela arlo horretan, hala nola 2004an Arabako Osasun Mentaleko Sarean ‘Besoak hutsik’ programa aitzindaria abian jarri izana, baina adierazi dute bikote askok ez dutela sarbiderik izan, eta Gipuzkoan eta Bizkaian ere ez dela ezarri.

Hala, onartutako legez besteko proposamenean, Osakidetzari eskatzen zaio sakondu dezala arretan inplikatutako langile guztien prestakuntzan, sistemaren eta tratuaren «humanizazio eta sentsibilizazio ikuspegitik», familiei laguntzeko eta informazioa emateko, eta, hala badagokio, talde terapeutikoak edo programa egonkorrak sortzeko.

Legebiltzarrak eskatu du Osakidetzan protokolo edo gida bateratu bakarra ezartzeko, dolu horiek jasaten dituzten pertsonak modu integralean artatzeko, eta asistentzia arloen eta mailen arteko koordinazioa bermatu beharko du, guztiek gertakariaren berri izan dezaten eta jarraipen hitzorduak susta ditzaten lehen mailako arretan, ginekologian, obstetrizian eta osasun mentalean.

Era berean, horrelako gertakariak izan dituzten pertsonei arreta emateko behar den intimitatea eta denbora bermatzea eskatzen da, Osakidetzako ospitaleetan espazioak egokituz eta amatasun arloan arreta saihestuz.