Ibaien higadurak arrainen eboluzioari forma eman diezaioke

Ikerlariek somatu dute Tennesse ibaiaren arroan, arrokak igatzen direnean, arrain mota baten multzoak ibaiadar desberdinetara bultzatzen dituela, eta horiek euren ezaugarri propioak garatzen ari direla, bioaniztasuna handituz.

Ibaien higadura faktore bultzatzailea izan daiteke tektonikoki inaktiboak diren eskualdeetan, MITeko zientzialariek ‘Science’ aldizkarian argitaratutako ikerketa baten arabera.

Hegoaldeko Apalatxeetan egin dute ikerketa, eta bereziki Tennessee ibaiaren arroan, ur gezako arrain aniztasun handiagatik ezaguna den eskualdean. Ikerlari talde batek jakin zuen ibaiak eskualdeko arroka mota ezberdinetan zehar higatzen ziren heinean, paisaia aldakorrak arrain espezie bat –hegats berdeko dardo izenekoa– ibai-sareko ibaiadar ezberdinetara bultzatzen zuela. Denborarekin, animalia talde horiek leinu ezberdinetan garatu ziren.

Hori dela eta, ikertzaile taldeak uste du erosioak hegats berdeko dardoa dibertsifikatzera eraman zuela. Populazio desberdinek itxuraz antzekoak diruditen arren, alde handia dago osaketa genetikoan. Oraingoz, populazio bananduak espezie bakar gisa sailkatzen dira.

«Emaiozu denbora gehiago higadura prozesu honi, eta uste dut leinu bereizi horiek espezie desberdin bihurtuko direla», dio Maya Stokesek, MITen graduondoa egin zuen ikertzaileak.

Baliteke hegats berdeko dardoa ez izatea ibaiaren higaduraren ondorioz dibertsifikatzen den espezie bakarra. Ikertzaileek susmoa dute higadurak beste espezie asko arro osoan dibertsifikatzera eraman dituela eta, beharbada, mundu osoko beste eskualde tektonikoki ez-aktibo batzuetan gauza bera gertatzen ari da.

«Bioaniztasunari laguntzen dioten faktore geologikoak uler baditzakegu, lan hobea egin dezakegu bioaniztasuna kontserbatzeko», dio ohar batean Taylor Perron MITeko Planeta, Atmosfera eta Lur Zientzietako irakasleak.