01 JAN. 2024 Turistek «bidesari» bat ordainduko dute Venezian sartzeagatik apirilaren 25etik aurrera Aurten, apirilaren 25etik aurrera, Venezia bisitatzeko sarrera bat ordaintzen hasiko dira turistak. Urtean 29 egunez soilik funtzionatuko duen «bidesari turistikoa» izango da, kanalen hiriko Udalak iragarri duenez. Venezian sartzeko ordaindu egin beharko dute turistek. (Claudio FURLAN | LaPresse) Bidaiari Venezian sartzeko txartel orokorraren prezioa 5 eurokoa izango da, Luigi Brugnaro Veneziako alkateak aurreratu duenez. Neurria egunero egongo da indarrean maiatzaren 5era arte, eta, ondoren, asteburuetan (larunbat eta igandeetan) kobratzen hasiko dira uztailaren 14ra arte.«Ez da iraultza bat, eguneroko bisitarien sarbidea arautzeko bide baten lehen urratsa baizik. Hiriaren, bertan bizi direnen eta bertan lan egiten dutenen bizigarritasuna hobetzea du helburu esperimentuak», azaldu du Brugnarok.«Sartzeko ekarpena»«Sartzeko ekarpena», hiriko Udalak deitzen duen bezala, derrigorrezkoa izango da 08:30-16:00 bitartean, 14 urtetik gorako bisitari guztientzat, eta salbuetsita geratuko dira hiriko egoiliarrak, langileak eta ikasleak, bai eta Venezian ostatu hartzeko erreserba duten turistak ere. Gainera, ordaintzen ez dutenei 50 eurotik 300 eurora arteko zigorrak ezarriko zaizkie. «Bide hori ezartzen duen lehen hiria da Venezia eta eredu izan liteke babestu beharreko beste hiri hauskor eta delikatu batzuentzat», alkatearen ustetan. Udalak kontrol-gela bat ere izango du euskarri, eta bertan jasoko dituzte pertsonak kontatzeko ardura duten sentsoreen datuak, museoetako sarreren emisioarenak eta kaietako eta ontziralekuetako trafikoarenak.Ekarpena hiri zaharrean bakarrik egin beharko da, San Markos plaza enblematikoa hartzen baitu, eta ez uharte txikiagoetan, Veneziako Lido, Pellestrina, Murano, Burano, Torcello, Sant 'Erasmo, Mazzorbo, Mazzorbetto, Vignole, S. Andrea, Certosa, San Servolo, S. Clemente eta Poveglia barne. Odoluste demografiko handia Veneziak 30 milioi turista jasotzen ditu urtean, eta duela hamarkada batzuetatik hona odoluste demografiko handia jasaten ari da; horren ondorioz, 1871n hasitako serie historikoan lehen aldiz, 50.000 pertsona baino gutxiago bizi dira hiriko gune historikoan, datu ofizialen arabera: 2022aren amaieran 49.665 ziren; urtebete lehenago, 50.430, eta 2000. urtean, berriz, 66.386.Venezia hiria eta bere aintzira Unescoren Munduko Ondarearen zati dira 1987tik, eta joan den uztailean arriskuan dagoen ondarearen zerrendan sartzea gomendatu zuen, baina, azkenean, NBEren erakundearen Batzordeak denbora ematea erabaki zuen Italiak kontserbazio-neurri gehiago gara zitzan, bere egungo plana, bidesari turistikoa barne, positiboki baloratu ondoren.«1950eko hamarkadatik esaten da Venezia hilzorian dagoen hiria dela. Gaur berriro diogu hiri bizia dela, mundu osotik etortzen diren turistei irekita jarraituko duena». Alkatearen hitzak dira.