15 MAR. 2024 Burdinbidearen Euskal Museoak lurrunezko trenen denboraldia hasiko du Aste Santuan Azpeitiko Burdinbidearen Euskal Museoak 2024ko lurrunezko trenen denboraldia inauguratuko du Aste Santuan hamar zirkulazio berezi eskainiz. Martxoaren 28tik apirilaren 1era gutxienez bi irteera izango dira egunero, 11:00etan eta 16:30ean, museoaren instalazioetatik Lasaoko geltokiraino. Museoko lurrunezko tren bat. (Andoni CANELLADA | FOKU) Bidaiari Azpeitiko Burdinbidearen Euskal Museoa 10:30etik 14:00etara eta 16:00etatik 19:30era irekiko da Aste Santuan, martxoaren 28tik apirilaren 1era, biak barne, Euskotreneko iturriek jakitera eman dutenez. Aste Santuaren ondoren, lurrunezko trenen zerbitzu erregularrak azaroaren 3ra arte funtzionatuko du larunbatero (12:00 eta 17:30) eta igandero eta jaiegun guztietan (12:00). Gainera, apirilaren 7tik aurrera, ‘Sugin egun batez’ jarduera ere eskainiko da igande eta jaiegunetan, tren makinan bidaiatzeko aukera ematen duen ekimena, alegia. Apirilaren 2tik aurrera, museoko instalazioen ordutegia honako hau izango da: asteartetik ostiralera (lanegunetan), 10:00-13:30 eta 15:00- 18:30; larunbatetan, 10:30-14:00 eta 16:00-19:30; igande eta jaiegunetan (astelehenak izan ezik), 10:30- 14:00. Europako tren bildumarik onenetakoa Burdinbidearen Euskal Museoak Europako tren bildumarik onenetakoa erakusten du bere instalazioetan, mota guztietako ibilgailuekin: lurrunezko tren makinak, dieselak eta elektrikoak; automotoreak eta bagoi mota desberdinak. Era berean, Euskadiko makina erreminta multzorik osatuenetakoa eskaintzen du, Urolako Trenbidearen tailer mekaniko zaharraren bidez, eta XIX. mende amaieratik trenbidean erabilitako uniformeen eta munduko tren erlojuen bildumarik onenetako baten erakusketak ditu. Azkenik, Burdinbidearen Euskal Museoak Espainiako gerra zbilean eta frankismo garaian esklabo gisa erabilitako bortxazko lanen biktimen omenezko erakusketa bat ere du ikusgai, modu iraunkorrean. Erakusten du 1937tik aurrera, diktaduraren zati handi batean, milaka gerrako preso eta, ondoren, preso komun erabili zirela herriak eta azpiegiturak berreraikitzeko edota errepideak, urtegiak edo trenbideak eraikitzeko.