Gasteiz, Mendi Tour zirkuitu ibiltariaren eszenatoki

Martxoaren 18tik 22ra bitarte, Mendi Film nazioarteko jaialdiko film onenen Mendi Tour zirkuitu ibiltaria Gasteizen izango da, zehazki Vital Fundazioa Kulturunean. Guztira, 14 zinta eskainiko dira bost egunez.

Bost egunez, martxoaren 18tik 22ra, Mendi Tour, nazioarteko Mendi Film jaialdiko film onenen zirkuitu ibiltaria, Gasteizen izango da. Urtero bezala, bertaratzen direnek aukera paregabea izango dute mendiko zinemarik onenarekin eta berrienarekin gozatu ahal izateko.

Jakina da Mendi Tourra ez dagoela bakarrik zuzenduta mendizale eta kirolzaleei, baita publiko orokorrari ere. Eta jakina da, halaber, filmak kalitate zinematografiko handikoak direla.

14 film

14 filmek osatuko dute aurtengo edizioko programazioa, eta, beti bezala, jorratutako gaiak anitzak eta askotarikoak dira: alpinismoa, eskalada, muturreko eskia, trail running, mendi-ibiliak, kayak, high-line, esplorazioa eta natura, besteak beste.

Film aipagarrienen artean Mendi Filmeko Sari Nagusia eta zuzendaritza onenaren saria irabazi duen ‘The Great White Whale’ dago, Australiako mendirik garaiena eta bakartiena eskalatzen saiatzen den mendizale eta marinel talde baten abentura epikoa kontatzen duena.

Bestalde, alpinismoko film onenaren eta soinu-banda onenaren saria jaso zuen ‘Rope’ eta gidoi onenaren eta kultura eta naturako film onenaren sariak jaso zituen ‘Carne et Ossa’ pelikulak ere proiektatuko dira.

Euskarak ere presentzia izango du, Gasteizko Mendi Tourrean hiru film eskainiko baitira euskaraz: Luis Arrietaren ‘212 Mountains’, Mikel Sarasolaren ‘Zerbait aldatu da’ eta Leire Egañaren ‘Oinez’.

5 euro eta bi egoitza berri

Emanaldi guztiak 19:30ean hasiko dira eta sarrerak 5 eurotan eros daiteke fundacionvital webgunean, Kordoi Etxean eta txarteldegian.

Bi egoitza berri izango ditu aurtengo edizioak: Araia (apirilak 20) eta Legutio (maiatzak 17). Horrela, mendiko zinema publiko zabalago batengana hurbilduko da, eta zirkuitua Euskal Herriko erreferentzia kultural gisa finkatzen lagunduko du.