Sarrerak %12,7 eta gaualdiak %42 gehitu dira martxoan EAEko landa ostatuetan

Euskal Autonomia Erkidegoko landa ostatuek 12.199 bidaiari sarrera eta 31.415 gaualdi zenbatetsi dituzte martxoan, hau da, aurreko urteko hil berean baino %12,7 eta %42 gehiago, hurrenez hurren, Eustat euskal estatistika erakundearen datuen arabera.

Atzerriko bisitarien sarrerak EAEko landa ostatuetan martxoan izandako sarrera guztien %14,1 izan dira, eta aurreko urteko martxoaren aldean %71,1 gehitu dira. Ostatu gauen kasuan, atzerritar jatorrikoak guztizkoaren %13,0 izan dira, hau da, %73,7 gehiago 2023ko martxoarekin alderatuta.

Herrialdeen arabera, martxoan, sarreren urte arteko hazkundea %43,0koa izan da Bizkaian, %38,7koa Araban eta %6,2koa Gipuzkoan. Ostatu gauei dagokienez, igoera %69,3koa izan da Araban, %57,4koa Bizkaian eta %27,4koa Gipuzkoan.

EAEko landa ostatuetako batez besteko egonaldia 2,58 egunekoa izan da martxoan –2023ko hil berean 2,04–. Batez besteko egonaldia bidaiariek gaua igarotzen duten establezimendu bakoitzean batez beste ematen duten egun kopuruari dagokio, eta ez EAEn egiten duten egonaldiaren guztizko iraupenari.

Plazen eta gelen araberako okupazio mailak %6,6 eta %7,5 puntu igo dira, hurrenez hurren, eta %25,1ean kokatu dira plazen arabera neurtuta eta %29,3an gelen arabera neurtuta.

Apartamentu turistikoak

Bestalde, apartamentu turistikoei dagokienez, martxoan 15.714 sarrera eta 54.189 gaualdi izan dira EAEn; aurreko urteko martxoarekin alderatuta, sarrerak %49,1 gehitu dira eta gaualdiak %37,1.

Apartamentu turistiko esaten zaio blokearen edo multzoaren modalitatean kudeatzen duen ustiapeneko enpresa unitate baten pean eskaintzen den ostatu unitate bakoitzari. Ez dira epigrafe honetan sartzen turismo erabilerako etxebizitzak, arrazoi turistikoengatik aldi baterako eskaintzen, merkaturatzen edo lagatzen diren etxebizitza partikularrak.

EAEko apartamentu turistikoetako sarrera guztien %25,7 eta gaualdi guztien %31,1 atzerriko bisitarienak izan dira martxoan, urte arteko %79,2ko eta %41,6ko igoerak izan ondoren, hurrenez hurren.

Apartamentu turistikoetako batez besteko egonaldia 3,45 egunekoa izan da martxoan, hau da, iazko hilabete berekoa (3,75 egun) baino txikiagoa. Gipuzkoan mota horretako establezimenduetako batez besteko egonaldia 5,25 egunekoa izan da, Araban 10,89 egunekoa eta Bizkaian 2,20 egunekoa.

EAEko plazen okupazio maila %36,4koa izan da, 2023ko martxoan baino %7,4 puntu gehiago. Apartamentuen okupazio mailak ehuneko 10,0 puntu egin du gora, eta %63,9koa izan da.

Aterpetxe turistikoei dagokienez, berriz, martxoan %35,6ko urte arteko hazkundea izan da sarreretan, 18.377 zenbatetsi ondoren; ostatu gauak 32.592 izan dira. Bizkaian 20.447 gaualdi izan dira, Gipuzkoan 11.693 eta Araban 452.

Ostatu mota horietako egonaldien batez besteko iraupena 1,77 egunekoa izan da martxoan EAE osoan, eta plazen okupazio maila, urte batetik bestera %5,6 puntu igo ondoren, %32,2ra iritsi da.

Aste Santua

Bestalde, bidaiarien sarrerak %7,8 eta gaualdiak %1,9 gutxitu dira EAEko landa ostatuetan aurtengo Aste Santuan, ostegunetik igandera (lau gau), apirilean ospatu zen 2023koaren aldean.

Herrialdeetan portaera desberdina izan da. Araban gehitu egin dira sarrerak eta gaualdiak (%17,4 eta %8,3, hurrenez hurren); Bizkaian, aldiz, %15,7 jaitsi dira sarrerak eta %4,0 gaualdiak, eta Gipuzkoan %9,1 lehenengoak eta %4,7 bigarrenak.

Plazen okupazio maila %62,8koa izan da, eta gelena %68,7koa; kopuru hori aurreko urtekoa baino %2,5 puntu txikiagoa izan da plazen arabera neurtzen bada, eta %2,2 puntu handiagoa gelen arabera neurtuta.

Apartamentu turistikoen kasuan, sarrerak %3,1 gehitu dira 2023ko Aste Santuarekiko eta gaualdiak %0,8 gutxitu. Sarrerak %53,6 jaitsi dira Araban, eta Gipuzkoan eta Bizkaian, berriz, %21,9 eta %7,1 igo, hurrenez hurren. Ostatu gauei dagokionez, %1,8ko igoera izan da Bizkaian, eta %9,4ko eta %0,3ko jaitsierak Araban eta Gipuzkoan, hurrenez hurren.