Lurraldeko turismo garapen iraunkorra bultzatuko du Bizkaiko Aldundiak

Lurraldean turismo garapen iraunkorreko ekimenak eta ekitaldiak garatzeko, 1.500.000 euroko inbertsioa egingo duela aurreratu du Bizkaiko Foru Aldundiak. Sektorearen beharretara hobeto egokitzea da helburua.

Bizkaiko Foru Aldundiko Garraio, Mugikortasun eta Turismo sailak 2024rako turismo dekretu berriak aurkeztu berri ditu. Iragarri du 1.500.000 euroko inbertsioa egingo dela lurraldean turismo garapen iraunkorreko ekimenak eta ekitaldiak garatzeko. Neurri horien helburua da sektorearen beharretara hobeto egokitzea eta erakunde publiko zein pribatuen parte hartzea sustatzea.

Aurreko urteetan ez bezala, dekretuak ez dira gaika antolatu, erakunde onuradunen arabera baizik. Sektore publikoaren eta pribatuaren artean bereizketa argia ezarri da, %60rainoko finantzaketa eskainiz sektore publikoko proiektuetarako, eta %30erainokoa sektore pribatukoetarako. «Horrek Bizkaiko turismoaren garapen orekatua eta iraunkorra bermatzen du», Diputazioak gaineratu duenez.

2024ko dekretuen aurrerapen nagusietako bat balorazio baldintzak eta irizpideak sinplifikatzea da, eskualdeen errealitateetara eta beharretara hobeto egokituz. Horrek diru laguntzak eskuratzea erraztuko du eta tokiko erakundeei aukera emango die turismo azpiegiturak eta zerbitzuak hobetzeko.

Gainera, diruz lagun daitezkeen baliabideak eta gastuak handitu dira. Berritasunen artean daude barne merkatuetan sustatzea, azoketara joatea, bisitariak erakartzeko jarduerak, prestakuntza arloaren barruan bisita teknikoak sartzea eta digitalizazioaren kontzeptua lurraldearen beharretara egokitzea.

Landa ostatuak

Landa ostatuak sustatzeko diru laguntzen ildo berri bat ere gehitu da, turismo eskaintza dibertsifikatzearen eta turismo iraunkorragoa sustatzearen aldeko apustua nabarmenduz.

Bizkaiko Turismoaren arabera, dekretu berriak «inflexio puntua eta estrategia berritua dira eskualdeei eta tokiko biztanleei onura handiagoak ekarriko dizkien turismo baterako». Gainera, foru erakundeak garapen turistiko iraunkorrarekin, azpiegitura turistikoaren hobekuntzarekin eta eskualde eta tokiko erakunde bakoitzaren behar zehatzetara egokitzeko duen konpromisoa islatzen dute.

«Neurri horiekin, Bizkaiak kalitatezko helmuga turistiko gisa duen posizioa sendotzeaz gain, turismo orekatuagoa, iraunkorragoa eta dibertsifikatuagoa sustatzen du, turismo sektorearen egungo eskaera eta erronken ildotik», esan du.