Angostoko Santutegian, hitzordu berezia abeltzain eta nekazariekin

Irailaren lehen egunean, Angoston hitzordu berezia izango da, urteroko nekazaritza eta abeltzaintza azoka ospatuko baita Santutegiko zelaietan. Aurten 31. edizioa beteko da eta, beti bezala, egitarau oparoa prestatu dute.

Ehunka lagun biltzen dituen azokaren helburua da Añanako eskualdean eta inguruan kontsumo-produktuak lantzen, hazten eta egiten dituzten nekazari, abeltzain eta artisauen lana herritarrei ezagutaraztea da. Horretarako, Añanako Landa Garapenerako Elkarteak hainbat jarduera antolatu ditu, honako hauek, besteak beste: haurrentzako sukaldaritza tailerra bertako produktuekin (lurra, papera eta Salcedoko guraizeak), Lumagorri eta Euskal ogia oilasko pintxoaren dastaketa, Orienting jarduera, adin guztietarako egurrezko joko handiak eta artzain-txakurren erakustaldia.

Topaketa berezi hau 1992an berreskuratu zen, ahanzturan iraun zuen bosturtekoaren ondoren, eta geroztik enklabe berean egin da: Angostoko Santutegiko zelaietan.

Azokaren abeltzaintza-izaera eta artisautza eta tokiko produktuak ikusarazteko asmoz, bertaratzen direnek abere autoktonoengana (behiak, zaldiak, ardiak eta ahuntzak) hurbiltzeko aukera izango dute, eta barazkiak, lekaleak, gaztak, marmeladak, zukuak, eztia, hestebeteak eta haragiak, olioa, txakolina eta antzekoak erakusteko eta saltzeko postu artean ibili ahal izango dira. Horrez gain, zeramika, forja, zura eta beste hainbat material lantzen dituzten artisauak ere ezagutu ahal izango dituzte.

Guraso Pasiotarren komunitateak hainbat elizkizun ospatuko ditu Angostoko Andre Mariaren Santutegian eta goiz osoan zehar Gesaltza Añanako txarangak azoka girotuko eta alaituko du.

Azokak Arabako Foru Aldundiaren, Eusko Jaurlaritzaren, Vital Kutxa Fundazioaren, Añanako Kuadrillaren, Gaubeako Udalaren, Villañaneko Administrazio Batzarraren eta Guraso Pasiotarren Komunitatearen laguntza ere badu.