Notre Dame katedraleko sarrera kobratzea proposatu du Parisek

Rachida Dati Frantziako Kultura ministroak Notre Dameko katedraleko sarrera turistentzat doakoa ez izatea proposatu du, barrura sartu nahi dutenek bost euroko «tarifa sinbolikoa» ordain dezaten.

Rachida Datik “Le Figaro” egunkariari eskainitako elkarrizketa batean azaldu duenez, tasa horrek urtean 75 milioi euro biltzea ahalbidetuko luke, «Parisko eta Frantziako eliza guztiak salbatzeko nahikoa».

Valérie Pecresse Parisko metropoli-eskualdeko presidenteak «oso ideia ona» dela esan du, baina ordainketa «turistei» mugatzea proposatu du, eta ez otoitz egitera joaten diren «fededunei». Hori dela eta, Datik sare sozialetan zehaztu du «elizkizun jarduerak, jakina, sarbide librea eta doakoa izaten jarraitu behar duela».

Agintariek erabaki behar dute zein izango den Notre Dame berreraikitzearen plana. 2019ko apirilean izandako suteak Parisko monumentu bisitatuenetakoaren egonkortasuna arriskuan jarri zuen.

Orain Kultura ministroak nahi du bisitariek ez bakarrik Notre Dame mantentzen laguntzea, baita kultura-ondare osoa ere. Erabakia estrategia baten barruan kokatzen du, Louvre Museorako sarrera bereizi bat proposatu duena Europar Batasunetik kanpoko herritarren kasuan. «Frantziarrek ez dute dena ordaindu behar», argudiatu du.

Klima-aldaketara egokituta

Bestalde, Parisek iragarri du Notre Dame katedrala klima-aldaketara egokituko duela. Horretarako, erabiltzen ez den aparkaleku bat bisitarientzako sarrera bihurtuko du, beste neurrien artean.

«Proiektu honen helburua da leku historiko bat goraipatzea, gure mendeko erronka handienaren testuinguruan kokatuz, hau da, berotze globalaren testuinguruan», azaldu du Anne Hidalgo Parisko alkateak, proiektuaren aurkezpen ekitaldian.