Garraiolari bat hil da Muxikan, deskarga lanetan ari zela

Zornotzako Transportes Agirre enpresako langile baten heriotzaren berri eman zuen atzo LABek. Langilea atzo hil zen, istripu ez traumatiko batean, Muxikan deskarga lanetan ari zela. Sindikatuak babes eta elkartasunik zintzoena azaldu zien hildakoaren senitarteko, auzokide eta gertukoei, baita oro har langile klaseari ere. Jakinarazi zuenez, aurten jada 31 langilek galdu dute bizia Euskal Herrian euren lanpostuetan. Araban hiru pertsona hil dira, hamaika Bizkaian, hamabi Gipuzkoan eta bost Nafarroan. ELA, LAB, ESK, Steilas, EHNE eta HIRUk elkarretaratzea antolatu dute biharko, 12.00etan, Transportes Agirre enpresan (Condor industriagunea).