«Naparra»-ren kasua Nazio Batuetara itzuli da, desagertu zeneko 40. urteurrenean

Ekainaren 11n berrogei urte beteko dira Jose Miguel Etxeberria Alvarez “Naparra” desagertu zenetik, eta bere anaia Enekok agerraldia egin zuen, atzo, Nazio Batuen Erakundeko Bortxazko Desagerpenen Batzordearen aurrean, azken urteetan izandako gertakarien berri emateko. Auziaren berrirekieraren, Labrit herrian egindako bilaketaren eta indusketa berria egiteko eskaeraren berri eman zuen, besteak beste. “Naparra”-ren heriotza BVE taldeak hartu zuen bere gain, baina gorpua ez da sekula azaldu, eta familiak lau hamarkada daramatza haren bila. Egiaren bila, justiziaren bila, eta merezitako atsedenaren bila.