25 NOV. 2022 Abortatzeko eskubidea Konstituzio frantsesean sartzeko lehen urratsa Maite UBIRIA Frantzia Intsumisoak (FI) eta Emmanuel Macron presidentearen gehiengoak, abortatzeko eskubidea frantziar Konstituzioan sartzeko bidea irekiz, urrats handia egin zuten atzo, Asanblea Nazionalean, emazteen ugalketa eskubideak babesteko. Ezkerrak aurkezturiko proposamenaren gainean testu bat hitzartu dute, eskubide horri berme gorena emateko. «Legeak bermatzen du, berdintasunez eta eraginkortasunez, haurdunaldia borondatez eteteko eskubidea», gehituko da Konstituzioaren 66. artikuluan. FIren ekimenaren bidez, berme gorena lortuko luke Simone Veil ministroaren bultzadapean 1974ko abenduaren 20an legezko bilakatu zen abortatzeko eskubideak. Atzo adosturiko testuari esker, abortatzeko eskubidea zalantzan emateko hel daitezkeen asmo atzerakoiak gelditzeko babes handiagoa izanen dute emazteek, ezker intsumisoaren bozeramaile Mathilde Panotek Asanblea Nazionalean nabarmendu zuenez. Zuzenketa gehiengo zabal batez onartu zuten. Zehazki, testu berriak 337 aldeko boto jaso zituen, eta, aldiz, 32 diputatuk kontrako botoa eman zuten. Gaurko bozketaren ostean, ibilbide luze bezain korapilotsua eginen du oraindik ere lege proposamenak. Senatuak behar luke lehenik eta behin testua aintzat hartu. Tramitazio hori gainditu ostean erreferenduma deitu beharko luke nahitaez Gobernuak Konstituzioaren aldaketari buruz. OHARRA«Krisi politiko, ekonomiko edo erlijioso bat gertatzea aski izanen da emazteen eskubideak kolokan jartzeko»; Valery Giscard d'Estaing presidente zelarik Simone Vielien Osasun ministroaren esaldia bere eginez, defendatu zuen Mathilde Panot diputatu intsumisoak abortatzeko eskubidea Konstituzioan sartzeko beharra.