20 JAN. 2023 Indiak aldaketa demografikoaren beldurra zabaldu du Kaxmirren India Kaxmirreko demografia aldatzen saiatzen ari dela beldur dira hango biztanleak. Gehiengo musulmana duen lurralde horretako biztanle askok haien jabetza uzteko agintarien eskaerak jaso dituzte, aspaldian hasitako prozesu batean beste urrats bat eginez. Indiako soldaduak, Kaxmirren. (Rakhesh BAKHSI | AFP) GARA SRINAGAR Indiak bereak direla aldarrikatzen duen lurretatik biztanleak ateratzeak beste polemika bat piztu du Kaxmirren. Gobernua gehiengo musulmana duen lurralde honen demografia aldatzen saiatzen ari den beldur dira biztanleak, haien ordez eskualdetik kanpoko jendea kokatzeko. Eskualdeko agintariek duela hamarkada batzuk hasi zuten lur horien jabe ziren herritarren etxegabetzea. Neurri horren aurkako protestak hasi ziren arren, etxegabetzea legeztatu egin zen 2020an, agindu judizial batek lurren jabetza «erabat ezdeusa» eta «konstituzioaren aurkakoa» zela deklaratu zuenean. «Hotel bat leku turistiko batean administratzen urteak daramatzat; orain lursaila husteko esaten didate, eta horrek, noski, nire mantenuarekin amaituko du», deitoratu zuen Ahmadek, kaltetuetako batek. Ahmadek bezala, beste herritar askok ere eskualdeko agintarien jakinarazpen bat jaso dute, urtarrilaren 31 baino lehen beren jabetzakoa bertan behera uzteko eskatuz. 2001ean 35.000 hektarea transferitu eta, lege baten bidez, lurrak okupatzen zituztenei erregularizatu egin zitzaizkien, Jammuko komisarioaren bulegoko funtzionario batek aditzera eman zuenez. Lurrak okupatzen dituztenak beldur dira lur horiek eskualdetik kanpo iritsitako pertsonen eta erlijio hinduaren eskuetan amaituko ote duten, Narendra Modi lehen ministroaren gobernuaren estrategia politikoari jarraituz, gehiengo musulmana duen lurraldearen demografia aldatzeko. New Delhik zuzenean kontrolatzen du lurralde hau 2019ko abuztutik. Orduan agintariek eskualdearen erdi-autonomia estatusari amaiera eman eta murrizketa gogorrak ezarri zituzten hilabeteetan, eskualdeko komunikazioei erabateko blokeoa ezarriz. Orduko estatus berezi hark kanpoko enpresak eta pertsonak finkatzea galarazten zuen. Orain, Indiako Gobernuak, garapena bultzatzeko helburua argudiatuz, neurri berriak justifikatu ditu. «Eta orain beldurrak (lurrak galtzekoak) egia bihurtzen ari dira», adierazi zuen Yousuf Tarigami buruzagi komunistak. Eskualdearen subiranotasuna lortzeko lehian, hiru gerra eta beste zenbait gatazka sortu dira Indiaren eta Pakistanen artean 1947tik.