20 AOûT 2023 MUNDUKO KOPA Ezustekoen txapelketa irabazle berri baten koroatzearekin amaituko da Espainiak eta Ingalaterrak lehen aldiz jokatuko dute Munduko Koparen finala Sidneyn, Irene Paredes eta Oihane Hernandez euskal ordezkariekin. Sarina Wiegmanen taldeak Europako Txapelketa irabazi zuen iaz, eta espainiarren palmaresa hutsik dago. Aitana Bonmati eta Georgia Stanway iazko Europako txapelketan. (Glyn KIRK | FOKU) Amaia U. LASAGABASTER Talde berri bat gehituko zaie Ameriketako Estatu Batuak, Alemania, Norvegia eta Japonia txapeldunei Munduko Kopako irabazleen artera. Ezustekoen torneoak ezingo luke amaitu irabazle berri batekin ez balitz. Finalera lehen aldiz heldu diren Espainiak edo Ingalaterrak ospatuko dute estreinako balentria hori. “Lionesses” selekzioa finalean ikusteak, nolanahi ere, ez du inor harrituko. Nahiz eta baja ugarirekin iritsi zen torneora eta sekula Munduko txapelketa batean dominarik kolkoratu gabekoa izan, titulua eskuratzeko hautagai handien artean ekin baitzion lehiari. Azken finean, Ingalaterrak Europako txapelketa irabazi zuen orain dela urtebete, sekulako futbola jokatuz. Taldearen bizkarrezurreko zenbait jokalarik min hartuta etxean geratu behar izan duten arren, iazko torneo handian belaunaldi berriak mailari eusteko gai zela erakutsi zuen, orain berresten ari diren bezala. Berme handia dute, gainera, aulkian, Sarina Wiegman; orain dela lau urte lortutako arrakasta errepikatzen ari da teknikaria, orduan ere Europako Txapelketa irabazi eta Munduko Kopako finalera heldu baitzen Herbehereekin. Zilarrezko dominarekin konformatu behar izan zen orduan aberkideen aulkian, Estatu Batuak faboritoaren aurka galduz. Gaur bere taldeari dagokio etiketa hori, are esperientzia gutxiago duen aurkariaren kontra. Izan ere, orain arte, Espainiak ez du kanporaketa bakar bat gainditu txapelketa handi batean. Ez da selekzio bien arteko desberdintasun bakarra. Federazioen lanaren eta hautatzaileen prestigioaren arteko aldeak artikulu oso bat beharko luke. Txapelketa honetan ibili duten bidean zentratuz, desberdina izan da, helmuga berera eraman baditu ere. Lehen fasea aise gainditu ondoren, ingelesek aurpegi ezezaguna erakutsi zuten Nigeriaren eta Kolonbiaren aurkako kanporaketetan, afrikarrak penaltietan gaindituz eta hegoamerikarrekin sekulako izerdiak botata. Australiaren kontra, aldiz, ohiko irudi menderatzaile eta eraginkorra eskaini zuten. Zigorra bete ondoren James berreskuratuko duen arren, anfitrioiak gailentzeko erabili zuen hamaikako bera zelairatu dezake gaur Wiegmanek. Baliteke Jorge Vildak aldaketak egitea. Askotan leporatu zaio erreakzionatzeko gaitasun txikia duela baina, multzoko fasean Japoniaren kontra sekulako jipoia jaso ondoren, taldea eta jokatzeko era aldatu zituen. Ingalaterrak ez bezala, kanporaketaz kanporaketa, eta beti pieza batzuk aldatuz, Espainiak goranzko bidea hartu du, aurkarien maila ere handitzen joan arren, finalera heldu arte. Bi euskaldun egongo dira Espainiako taldean. Hasieratik jokatuko du Irene Paredesek, eta zalantzan dago Oihane Hernandezen parte hartzea; entrenatzailearen konfiantza bereganatu ondoren, zigorra bete behar izan zuen eta, Carmonak Suediaren aurka egindako lan onak sopeloztarraren itzulera oztopatuko du. Edozein kasutan, badirudi Vildak aldaketak egingo dituela. Oihaneren balizko titulartasunaz gain, litekeena da hamaikakora bueltatzea azken bi partidetan erabakigarria izan den Paralluelo. Sakrifikatua Alexia izango litzateke. Brontzea alde batera, sostengua bestera Suediak podiumaren hirugarren postuan amaituko du laugarren aldiz, Australia merezimendu osoz gainditu ondoren (2-0). 2013ko Europako Txapelketako brontzearekin hasi zen zikloa ederki amaitu du belaunaldi honek, bi zilar olinpiko eta munduko bi brontzezko dominak gehituz. Hasieratik hobea izan zen Suediako selekzioa. Eta 50.000 eztarrik bultzatua, Australiak erantzuteko forma aurkitu zuenean, europarren lehen gola heldu zen. Huntek Blacksteniusi egindako penaltia Rolfok sartu zuen 30. minutuan. Hor amaitu zen partida etxekoentzat, hauen erreakzioa eragozteaz gain, lasai eta sendo bilatu baitzuen Suediak bigarren gola. Asllanik sartu zuen 61. minutuan, Milango jokalariak egin duen txapelketa ederrari ginga jarriz. Atzoko partida galdu izanaz aparte, Australiarrek badituzte harro egoteko arrazoi franko. Hilabete osoan zehar bere herriak eskainitako sostengua ez da keinuetara mugatuko, eta Sam Kerrek goraipatu zuen «herentziak» badauka esaldia: «Play our way», Australiako gobernuak emakumezkoen kirola sustatzeko martxan jarriko duen programa, 200 milioi dolar inbertituz. A.U.L. URTE BIRIBILABronzek eta Walshek urte ahaztezina biribilduko dute urrea lortzen baldin badute. Europako Txapeldunak iazko udan Ingalaterrarekin, Liga, Superkopa eta Txapeldunen Liga irabazi dituzte Bartzelonarekin denboraldi honetan.