Osakidetzak erizainekiko duen «tratu txarra» salatzeko elkarretaratzeak egingo dituzte

Satse erizainen sindikatuak salatu zuen Osakidetzak aurreko oposizioa oraindik ez duela ebatzi, eta hurrengoa hilabete barru dela. 2018-19ko hautagaien zerrenda behingoz argitaratzeko eskatu zuten.

Erizainek elkarretaratzea egin zuten atzo Donostia Ospitalean, eta datorren ostegunean Osakidetzaren Gasteizko zerbitzu zentralen aurrean egingo dute; Osakidetzak erizainekiko duen «tratu txarra» salatzeko. Izan ere, erizainek oraindik ez dakite plaza finkorik ote duten, osasun-erakundeak ez baitu aurreko oposizioa ebatzi. Eta hurrengo oposizioak hilabeteren buruan egin behar dira, Satse sindikatuak azaldu zuenez.

EAEko Erizainen Sindikatuak mobilizaziora deitu du, «tratu txarrak» eta «Osakidetzak erizainekiko duen errespetu falta» direla eta. Sindikatuak argudiatu zuenez, Osakidetzak «ez du bere hitza bete», aurreko lan-eskaintza publikoa oraindik ebatzi ez duelako. Satsek protesta gehiago antolatu ditu, eta erizainei dei egin die protesta horietan «modu masiboan» parte har dezaten. «Kategoria gehienak argitaratu dira, erizainarena izan ezik, eta hori guztiz diskriminatzailea iruditzen zaigu», salatu zuten sindikatutik.

Horrela, «erizaintzako milaka profesionalek tasak ordaindu eta hilabeteetan ikasi behar izan dute, aurreko prozesuan plazarik lortu duten jakin gabe». Gainera, sindikatuak salatu zuenez, beren bizitza «hankaz gora» jartzen duen azterketa bat prestatu behar izan dute, agian plaza finkoa duten bitartean.

«Ez da bidezkoa ahalegin izugarri hori egin behar izatea, bizitza pertsonala eta familiarra alde batera utzita, agian plaza finkoa izanda eta beste azterketa bat prestatzea beharrezkoa izan gabe», adierazi zuten.

«KUDEAKETA DESEGOKIA».

Satsek gogorarazi zuen hilabeteak daramatzatela mobilizatzen eta Osakidetzari eskatzen LEP honen ebazpena azkartzeko eta 2018-19ko LEPko hautagaien behin-behineko zerrenda argitaratzeko. «Elkarretaratzeak, protestak eta 12.000 sinadura baino gehiago bildu ditugu, Osakidetzak prozesu hau konpontzeko baliabide material eta giza baliabide guztiak jar ditzan. Hala ere, Osakidetzak ez du hitza betetzen», deitoratu zuten.

«Berriro ere, argi esan behar diogu Osakidetzari nazkatuta gaudela kudeaketa txarrarekin eta langileen aurkako tratu txarrekin», salatu zuten.