27 DéC. 2023 Emantzipatzeko 300 euro, 25 eta 29 urte bitarteko gazteentzat Lakuako Gobernuak bi urterako dirulaguntza bat eskainiko die gazteei, gero eta zailagoa den emantzipazioan «bultzada bat emateko». Hilero 300 euro emango dizkie. Eskaerak jasotzeko epea otsailaren 20an irekiko da. 2024an 15.000 pertsonatik gora laguntzea espero dute. Jonan Fernandez Trantsizio Sozialaren idazkari nagusiak aurkeztu zuen dirulaguntza. (IREKIA) GARA GASTEIZ Lakuako Gobernuak 300 euro emango dizkie 25-29 urte bitarteko gazteei hilero, bi urtez, etxe bat alokatzeko edo erosteko. Jonan Fernandez Trantsizio Sozialaren eta 2030 Agendaren idazkari nagusiak nabarmendu zuenez, ez da etxebizitza gastuetarako laguntza bat; asmoa emantzipazioa erraztea da, salto hori ematea inoiz baino nekezagoa den garaian. Gazteriaren Kontseiluaren datuen arabera, 29,7 urtekoa da batez besteko emantzipazio adina Araba, Bizkai eta Gipuzkoan, eta 30 urtetik azpikoen %16,3 soilik bizi dira familiaren etxetik kanpo. Hori urrun dago gazteen nahitik, haiek 24 urtetan irten nahi baitute gurasoenetik. Etxebizitzaren merkatua ere traba da: etxebizitza parke publikoa ez da parke osoaren %2ra ere iristen. Beraz, logika pribatuetan mugitzen da ia etxebizitza batera sarbidea izan nahi duen oro. Gazteek alokairuen prezioa mugatzeko eta etxebizitza publiko gehiago sortzeko eskatzen dutela jasotzen du Gure Geroak egindako txostenak. 5.900 laguni galdetu zien iritzia. Hor kokatzen da Emantzipa Programaren laguntzak arautzen dituen dekretua, atzo Lakuak onartu zuena. Fernandezek azaldu zuenez, ez da isolatua, eta beste laguntzekin uztartzen da, ekosistema baten parte da, ez delako posible emantzipatzeko dauden zailtasunak dirulaguntza batekin konpontzea. Aipatutako ekosistemaren barnean honako ekimenak aipatu zituen, emantzipaziorako laguntza honekin bateragarriak direnak: 200 euroko laguntza ume bakoitzeko, Gaztelagun alokairuko laguntza, haur eskolak doakoak izatea 0-2 urteko etapan, gutxieneko diru sarreraren errenta jasotzeko adina aurreratu izana, eta kalteberatasun egoeran dauden gazteak baztertzeko prebentzio neurriak. «Finean, gazteentzat baldintza onuragarriagoak izatea nahi dugu, haien bizi proiektuak garatzeko», esan zuen. EPEAK ETA BALDINTZAK Emantzipaziorako laguntza eskaera epea otsailaren 20an zabalduko da, baina jada kontsultak egin daitezke Gazte Aukeran edo GAZ emantzipazio zerbitzuan (646 109 126 telefonoan edo gaz@euskadi.eus helbidean). Bultzada hori jasotzeko baldintza batzuk bete behar dituzte gazteek: 25 eta 29 urte bitarte izan behar dute, biak barne. Eta emantzipazio prozesu bat hasita eduki behar dute, edo hastear. Horretaz gain, EAEn erroldatuta egon behar dute, eskaera egin baino urtebete lehenagotik gutxienez edo, bestela, azken hamar urteetan hiru urtez jarraian erroldatuta egon direla egiaztatu beharko dute. Urtean 3.000 eurotik gorako eta 28.000 eurotik beherako diru sarrerak izan beharko dituzte, edo 34.000 eurotik beherakoak, aitorpena ezkontidearekin edo izatezko bikotekidearekin batera egiten bada. Ondasun, eskubide edo aktibo finantzarioei dagokienez, ezingo dira 75.000 eurotik gorakoak izan. Emantzipatu direla egiaztatu beharko dute, etxebizitza libre baten errentamendu edo salerosketa kontratua aurkeztuta, eta ohiko bizileku iraunkorra izan beharko da. Ezin izango dute laguntzarik jaso alokairuko babes publikoko etxebizitza bat (Bizigune eta ASAP programak barne) edo jabetzako babes publikoko etxebizitza bat dutenek, ezta etxebizitzak hilero diru egiaztagarririk ez badakar ere. Gehienez etxe berean bizi diren hiru pertsonak eska dezakete laguntza, eta laguntzaren kantitatea ez da jaitsiko horregatik. «Kontuan hartu dugu bikoteen emantzipazioak dauzkan arazoak, eta ez dizkiogu horri muga gehiago jarri nahi», azaldu zuen idazkari nagusiak. BOST BIDERJonan Fernandezek zehaztu zuenez, 2024ko aurrekontuak 53 milioi euro ditu Emantzipa Programarako. «Aurreko urteetako gazteriaren aurrekontua baino bost aldiz diru gehiago da hori», esan zuen.