Izen handiei ere iritsi zaie lanerako garaia

Berezkoen Buruz Buruko Txapelketa aurrera doa, eta izen handiak ere hasi dira agertzen, Lanbert anaiak, Larralde eta gisakoei ere iritsi baitzaie lanean hasteko tenorea, eta gainera, final-laurdenetako txartelak izango dira jokoan.

Gaur bi kanporaketa jokatuko dira Baigorrin, eta 18.00etan hasiko da jaialdia. Lehen partidan, Laurent Lanbert eta Bilbao izango dira aurrez aurre. Azken hau bi kanporaketa erraz gaindituta dator, eta zaleengan itxaropen handia piztu du. Ez berak bakarrik, baita bere adineko beste batzuek ere, ugari izan baitira aurten profesionaletara pasa direnak.

Laurent Lanbertek, ordea, eskarmentu handia du, eta horrekin arazo asko sortuko dizkio. Bere anaiarekin batera udan modan egon den horietako bat da Laurent. Garaipena lortzen duena final-laurdenetan Paxkal Ezkurraren aurka neurtuko da.

Ondoren, beste Lanberten txanda izango da, Ximunena, alegia. Saldubehere izango du aurrez aurre, eta Bilbao bezalaxe, azken hau ere sekulako txapelketa egiten ari da onenekin jokatzen ari den lehen denboraldian. Gainera, bakarka oso ongi moldatzen den pilotaria da, erraz egiten du buruz buru, eta Ximunek argi ibili beharko du, bestela kanpoan geratzeko arrisku handia izango du. Hemen ere, garaipena lortzen duenak final-laurdenetarako bidea egingo du, eta han Thierry Harizmendirekin jokatu beharko du.

Donapaleun

Bihar, berriz, Donapaleun jokatuko dira kanporaketak, eta han ere bi partida izango dira, 16.00etan hasita. Lehen neurketan, Larralde eta Palomes neurtuko dira.

Bi pilotariak gazteak dira, nahiz eta Larraldek bigarren urtea baduen onenekin jokatzen. Berarengan itxaropen handiak daude. Palomes gaztea, berriz, berea eginda dator. Lehen urtea du onenekin, eta bi kanporaketa gaindituta helburua bete du.

Larraldek Superprestigioan lan bikaina egin zuen, eta ia finalean ere sartu zen. Garaipena lortzen duenak final-laurdenetarako txartela eskuratuko du, eta Agusti Waltariren aurka jokatu beharko du.

Ondoren, Bonebeltxe eta Lamure izango dira aurrez aurre. Bonebeltxek eskarmentu handia du, eta bera aterako da garaipena lortzeko faborito nagusi. Garaipena lortzen duen pilotariak Battitte Ducassouren aurka jokatuko du.