Dagerrotipoak hartu zuen lehenbizikoz Ilargiaren irudia, orain 184 urte

1839ko urtarrilaren 2an, Louis Daguerre asmatzaileak Ilargiaren lehen argazkia atera zuen. Dagerrotipoaren bitartez egin zuen, bere izena daraman argazki-metodo aitzindaria.

Gaur 184 urte, 1839ko urtarrilaren 2an, Louis Daguerre fisikari, pintore eta asmatzaile frantsesak Ilargiaren lehen argazkia atera zuen. Daguerrek Ilargiaren irudi partziala aurkeztu zion munduari, eta horrek argazkilaritza modernoaren aitzindari bihurtu zuen.

1789ko azaroaren 18an jaio zen Cormeilles-en-Parisis herrian, eta dagerrotipoaren asmatzailea izan zen, bere izena daraman argazki-metodo aitzindaria. Tresna honen bitartez lortu zuen Ilargia irudian harrapatzea.

Bestalde, 1838an, pertsonak agertzen diren lehen argazkia egin zuen Daguerrek. Irudiak pertsona bat erakusten du Parisko Tenplearen Bulevarrean, baina irudia hartzeko esposizio-denbora luzea behar zenez —hamar minutu baino gehiago—, ez dira ikusten trafikoa eta oinez dabiltzan pertsonak. Zenbaitek uste dute argazkian agertzen den pertsona hori aktore bat zela.

Balentria egin eta bi hilabetera, fisikariaren laborategia erabat erre zen, eta erregistro guztiak, idatziak, lan esperimentala eta astroaren jatorrizko irudia galdu zituen.

Ezusteko horretatik urtebete igaro ostean, John William Draper mediku eta kimikari estatubatuarrak Ilargiaren beste argazki bat hartu zuen; hau, Daguerrerena ez bezala, ez zen argazki partziala.

Hala eta guztiz ere, Louis Daguerre asmatzailearen izena historian sartu zen, satelitearen argazki bat ateratzen lehena izan baitzen.