‘Googaz’, garapen jasangarriaren helburuak jokoen bidez hobeto ezagutzeko ekimena

Gazteei zuzenduta, BBK Kunak bultzatutako ekimenak garapen jasangarrirako helburuen ezagutza zabaldu nahi du. Erronken bidez, antsietatea, errefuxiatuen egoera, genero indarkeria, etorkizuneko hiriak eta etxebizitza bezalako gaiak jorratuko dituzte.

BBK Kunak ‘Googaz’ ekimena jarri du abian, errealitate birtualeko jokoen bidez gazteek garapen jasangarrirako helburuak hobeto ezagutu ditzaten. Ekimena «milennial inkonformistek sortutako mugimendu bat» da, eta EAEko gazteak ekintzara eta beren bizitzaren jabe izatera motibatzeko helburua du.

Egitasmoa astearte honetan aurkeztu dute Bilbon Oihane Aldayturriaga BBK-ko Ekintzailetza, Talentu eta Berrikuntza arloko arduradunak, Irati Arejita ‘Googaz’ ekimeneko arduradunak eta Yera Zaldunbide Virtualware Taldeko Marketing arduradunak.

Mugimendua 2017an hasi zen, orain arte lau edizio egin dira eta bakoitzean erronka sozial bat landu dute. Aurten ere, erronka berri batekin itzuli da ‘Googaz’, garapen jasangarrirako helburuak euskal gazteei hurbiltzea, hain zuzen ere.

Horrela, errealitate birtuala aliatu dela, BBK Kunak Bizkaiko Foru Aldundiarekin eta Virtualware Taldearekin batera bultzatutako ekimenak Araba, Bizkai eta Gipuzkoako bost udalerritako 16 eta 30 urte bitarteko gazteak animatuko ditu erronkan parte hartzera eta antsietatea, errefuxiatuen egoera, genero indarkeria, etorkizuneko hiriak eta etxebizitza moduko gaiak jorratzera.

Zehazki, 'Googaz' Leioan egingo da apirilaren 24an eta 25ean, Gernika-Lumon apirilaren 27an eta 28an, Durangon maiatzaren 2an, Balmasedan maiatzaren 4an eta 5ean, eta Getxon maiatzaren 11n eta 12an. Izen-ematea www.googaz.eus webgunearen bidez egin ahal izango da.

Ekimenaren lehen fasean, apirilean eta maiatzean, Bizkaiko bost udalerri horiek zeharkatuko dira, eta gazteek, ikastetxeen eta deialdi ireki baten bidez, aukera izango dute garapen jasangarrirako helburuekin lotutako erronken inguruan errealitate birtualaren bidez jolasteko eta esperimentatzeko baita horien inguruan hausnartzeko ere.

Joko baten gidoia diseinatu

Bigarren fasean, BBK Kunan ekainaren 17an izango den hackathoian parte hartzeko aukera izango dute herri bakoitzeko parte hartzaileek. Bertan, garapen jasangarrirako helburuetako erronka batean lan egin beharko dute, errealitate birtualeko joko baten gidoia diseinatuz taldeka. Talde irabazleak errealitate birtualeko betaurrekoak irabaziko ditu kide bakoitzarentzat.

Azkenik, hackathoian sortutako gidoiarekin eta bi ikastetxerekin lankidetzan, ‘Googaz’ ekimenak datorren urtean Bizkaiko herrietara eramango duen jokoa diseinatu eta sortuko da.

Ekimenaren aurreko edizioetan ekintzailetza, tokiko merkataritzaren digitalizazioa eta emantzipazioa bezalako gaiak landu dira, eta guztira, 1.200 gazte baino gehiagorengana iritsiko da ekimena, nabarmendu dutenez.