13. Elkar Sketch Iruñea egingo dute hilaren 26an, marrazketa maratoia arte grafikoa maite duen komunitatearentzat

Marrazketa eta orokorrean arte grafikoa maite dutenek hitzordua dute hiriburu nafarrean urriaren 26an, 13. Elkar Sketch Iruñea ekitaldiarekin. Hiri zaharreko lau leku zehaztu dituzte, eta adin ezberdinetako lehiakideentzat marrazteko maratoia da eskaintza nagusia.

Urriaren 26an, 13. Elkar Sketch Iruñea egingo dute hiriburu nafarrean, marrazki-maratoiaren edizio berri bat martxan jarriz. «Sketching-zaleentzat erreferente bihurtu» da hiriko marrazki maratoia, antolatzaileen esanetan, eta Iruñekoaren kasuan, gero eta jarraitzaile gehiago duen ekitaldia dela aipatu dute.

Marrazketa, ilustrazioa eta arte grafikoa maite duen komunitate artistikoari zuzenduta, aurtengo edizioa «berezia» da Elkarrentzat, «Elkar Comedias dendaren 40. urteurrenarekin bat egiten baitu». Gogoratu dutenez, espazio horretatik honelako kutur proiektuak, artea eta sormen bultzatu dira, komunitatera hurbilduz.

Parte hartzeko, izena eman behar dute ilustratzaileek urriaren 24ra arte egongo da inskripzioa egiteko epea, Elkarren atari digitalaren bidez edota Iruñeko Elkar liburu-dendetan. Plazak mugatuak direla gogoratu dute.

Goizeko 9.30ean abiatuko da maratoia Comedias kaleko Elkar liburu-dendan. Bertan 11.00ak arte maratoian parte hartzeko materiala banatuko dute. Behin materiala jasota arratsaldeko 18.00ak arte izango dute lehiakideek marrazteko epea. Izan ere, Comedias liburu-dendan utzi beharko dute marrazketa koadernoa 18.00ak baino lehen.

Hiriko lau marrazki

Hiriko lau zonalde marraztu beharko dituzte parte hartzaileek: Udaletxea, Santo Domingoko Merkatua, Nafarroako Artxibo Nagusia eta Pamplona Catedral Hotela. «Lehiakide bakoitzak lau leku hauetako bakoitzean marrazki bana egin beharko du gutxienez, baina hauez gain hiriarekin zerikusia duten nahi adina marrazki aurkeztu ditzake libreta berean: barrualdeak, kanpoaldeak, subjektuak. objektuak, eszenak...», azaltzen dute oinarriek.

Hiru kategoria ditu lehiaketak: 16 urtetik gorako helduentzako lehena, 10 eta 15 urte artekoentzat bigarrena, eta 10 urtetik beherako haurrak hartuko dituen hirugarrena. Sariei dagokienez, 100 euroko Elkar opari txartela eta Moleskine saria jasoko du helduen koaderno onenak, 70 euroko opari txartela eta Moleskine saria  gazte koadernoak, eta 50 euroko opari txartela eta beste sari bat haur-koadernoak.