Rafael Mikoleta ikasleentzako Euskarazko Ipuinen XXXVII. Lehiaketarako izen ematea ireki dute Bilbon

Rafael Mikoleta ikasleentzako euskarazko lehiaketaren edizio berri bat jarri du abian Bilboko Udalak. 8 eta 16 urte bitarteko ikasleei zuzenduta, urtarrilaren 31ra arte aurkeztu ahal izango dituzte lanak.

Urtarrilaren 31ra arte irekita egongo da Rafael Mikoleta Euskarazko Ipuinen XXXVII. Lehiaketan izena emateko epea. Zortzi eta hamasei urte bitarteko ikasleek parte hartu ahal izango dute.

Lehen euskal gramatikaren egilearen omenezko lehiaketa honek ikasle bilbotarren artean euskarazko irakurketa eta idazketa sustatzea du helburu. Aurreko edizioan, 861 ipuin aurkeztu ziren. Deialdiaren inguruko informazioa eta oinarriak eskuragarri daude Bilboko Udalaren web orrian eta www.bilbaoeuskaraz.eus orrian.

Originalak jasotzeko epea urtarrilaren 31ko 14.00ak arte egongo da zabalik, eta 14 sari izango dira guztira, hiru sari kategoria bakoitzeko: sei Lehen Hezkuntzan –3. mailatik 6. mailara arte–, beste sei Derrigorrezko Bigarren Hezkuntzan –DBHko lau mailetako ikasleentzat– eta bi ‘Bilbao Balioen Hiria Saria’ kategorian. «Istorioak irudikatu, sortu eta hitzetan islatzea» da gakoa, nabarmendu dutenez.

Bilboko balioak

Ipuinak Bilboko Udaleko Euskara Zuzendaritzan entregatu beharko dira, Campo Volantin pasealekuan.

Gai librekoak, euskaraz idatzita eta marrazkiekin ilustratuta egon behar dute, originalak izan behar dute eta egile bakar batenak, ordenagailuz, makinaz edo kaligrafia argiz idatziak, eta 2 eta 4 orri arteko luzera izan beharko dute. Jatorrizko dokumentua koloretan emango da, eta lanaren kopia bat.

Kategoria bakoitzean, 3 sari banatuko dira. Lehenengoak 200 euroko balioa duten opariak izango ditu; bigarrenak 160 euroko balioa duten opariak; eta hirugarrenak 120 euroko balioa duten opariak.

Gainera, aurten ere, lehiakideek ‘Bilbao Balioen Hiria Saria’ kategorian parte hartu ahal izango dute. Sari horretan, Bilboko Balioen Kartan jasotako balioetako bati erreferentzia egiten dioten bi ipuin sarituko dira. Bi sari horiek 170 euroko balioa dute eta DBHko ikasleei zuzenduta daude. Epaimahaia literaturaren munduarekin zerikusia duten pertsonek osatuko dute.