EH Bilduk Bizkaiko zuzendaritza berria aurkeztu du igande honetan Bilbon egindako ekitaldi batean. Asier Vega koordinatzaileak koalizio subiranistaren etorkizunerako erronkei buruz mintzatu da eta Bizkaiko hiriguneak duen garrantzia nabarmendu du.

Berarekin batera, hurrengo hauek osatuko dute mahai politikoa: Izaskun Duque, politika instituzionaleko arduraduna; Nahia Sanz, udalgintza arduraduna; Arkaitz Unzueta, antolakuntza arduraduna; Andrea Bosch komunikazio arduraduna; Sandra Llano, alternatibako ordezkaria; Iker Rahona, EAko ordezkaria; Paul Laka, Sortuko ordezkaria; Bea Ilardia, Bizkaiko Batzar Nagusietako bozeramailea; Asier Gonzalez, Bilboko Arduraduna; Raquel Goñi, Bizkaiko koordinazio guneko arduraduna; eta Arantzi Sarasola, hiriguneko arduraduna.

EH Bildu gero eta pertsona gehiago biltzen dituen proiektu politikoa dela azpimarratu dute aurkezpenean. «Proiektu politiko oso anitza da, Bizkaia bezala. Bizkaian errealitate ezberdinak daude eta horiekin bat egingo dugu», nabarmendu du Bea Ilardiak. Oinarrien parte hartze zuzena EH Bilduren «elementurik garrantzitsuena» dela nabarmendu du: «Hausnartu, eztabaidatu eta erabakitzea gure praktika pilitikoaren muina izan da. Horrela izan da azken 10 urteetan eta horrela izaten jarraituko du».

Era berean, EH Bilduk, 10 urte betetzen duen urte honetan, «jauzi garrantzitsuak» emateko prest dagoela azpimarratu du. «Hamarkada luze honetan, egon garen toki guztietan erakutsi dugu beste modu bat daukagula egiteko, Bizkaia ulertu eta Bizkaia egiteko beste modu bat», azaldu du.

Maddalen Iriarte, Gasteizko Parlamentuko EH Bilduko bozeramailea, aurkezpenean izan da ere. Bizkaia Euskal Herriarentzat «estrategikoa» dela azpimarratu du. «Badakigu Bizkaia auzoz auzo eta herriz herri irabazi behar dugula. Herritar bakoitzarekin egonez, Bizkaia ezkerretik eta subiranismotik eraikiko dugu. Horrek emango du aukera berdintasuna eta gizarte justu eta duinago bat eraikitzeko», adierazi du.

Bukatzeko, Asier Vega Bizkaiko koordinatzaileak hartu du hitza. Bizkaiak etorkizunean dituen erronkak «ezinbestean» Bizkaiko hirigunetik pasa beharko direla nabarmendu du.

«Gure proiektu politikoa ondo errotuta dago eta gero eta gehiago indartzen ari da Bizkaian. Dena dugu irabazteko, eta jauzi kualitatibo bat egiteko unea da, Bizkaia justuago, anitzago eta solidarioago batera pauso bat emateko unea», aldarrikatu du.