Espetxe politika aldatzeko konpromisoak eskatu dizkie Herrirak erakundeei

Herrirak elkarretaratzea egin du Gasteizko Legebiltzarraren aurrean, erakundeei espetxe politikaren alorrean urratsak egin ditzaten exijitzeko. Maiatzaren 18an Euskal Herriko plazak betetzeko deia egin du.

Herrira mugimenduak deituta, elkarretaratzea egin dute Gasteizko Legebiltzarraren aurrean, #M18Plazara ekimenari begira, ‘Derechos humanos. Solución. Paz. Euskal presoak Euskal Herrira’ lelopean. Herrirako kideez gain, EH Bilduko hainbat legebiltzarkidek ere parte hartu dute kontzentrazioan.

Julen Arzuagak, komunikabideei eginiko adierazpenetan, erakundeei konpromisoa eskatu die espetxe politikaren inguruko aldarrikapenak bideratu daitezen urratsak egin ditzaten. Hala, gaitz larriak dituzten presoak aske utz ditzaten, zigorrak beta dituztenak kalera ditzaten eta sakabanaketarekin buka dadin konpromisoak galdegin ditu.

Aldarrikapen hori gizartean oso txertatua dagoela nabarmendu du EH Bilduko kideak eta horregatik uste du erakundeek gauzatu daitezen lan egin behar dutela esan du, batez ere Estatu espainola eta frantsesa «inmobilismo egoera batetik inboluziora» pasatzen ari direnean.

Horregatik, datorren maiatzaren 18an Euskal Herriko plazetan egingo diren mobilizazioetan parte hartzeko deia egin du, bestelako espetxe politika bat aldarrikatzeko.