Josune Arriaga Valladolideko espetxera eraman dute

Josune Arriaga presoa berriro sakabanatu dutela jakinarazi du Herrirak. Iruñetik ez aldentzeko eskaerak egin ziren arren, Zaballatik Valladolideko espetxera trasladatu dute, eta transitoko moduluan sartu dutenez, berriro ere Salamankara bueltan eraman dezaketela ohartarazi dute.

Ohar baten bitartez Herrira mugimenduak jakinarazi duenez, Josune Arriaga Zaballako espetxe arabarretik Valladolidekora urrundu dute.

Herrirak hartarazi duenez, bertan transitoko moduluan sartu dute eta, hortaz, «litekeena da Salamancara bueltan eramatea».

Gogoratu dutenez, Arriaga Salamankatik Iruñera ekarri zuten maiatza bukaeran, larriki gaixo dagoen ama bisitatzeko baimen bereziarekin (eritasun horren ondorioz, hamar urte egin dituzte ama-alabek elkar ikusi gabe).

Iruñean eman dituen bi asteetan, mobilizazio eta eskaera ugari egon da, berriro urrundu ez zezaten, «aukera izan amaren azken egunetan haren ondoan eta familiaren ondoan egoteko».

Estatu espainiarrak, baina, «krudeltasunez» erantzun duela gaitzetsi du Herrirak, «Nafarroako familia honen eskubide oinarrizkoenak zanpatuta».

Honi lotuta, kolektiboak ordubeteko elkarretaratzea deitu du ostiral honetarako (11.30etik-12.30era), Nafarroako Parlamentuaren aurrean, «hautetsiei entzunarazteko preso politikoek jasaten dituzten giza eskubideeen urraketen berri».