Urtero legez, Lasa eta Zabala gogoratu dituzte Tolosako Bentaundi auzoan

Nahiz eta 30 urte igaro Lasa eta Zabala desagertu eta hil arte torturatu zituztenetik, bizirik diraute oraindik senide eta lagunen memorian, «sentimendua ezin baita kare artean lurperatu». Ekitaldi xume bezain hunkigarria egin diete  ehunka pertsonek Bentaundin, eta memoria, justizia eta erreparazioa aldarrikatu dituzte, Galindoren baldintzapeko askatasuna gogoan.

Tolosako Bentaundi auzoan izan da zita, Joxean Lasa eta Joxi Zabalaren omenezko monolitoa jarria dagoen plazatxoan. Ikurrina handi batez inguratua zegoen oroitarria, alboan txalaparta zuelarik. Pixkana joan da jendea gerturatzen eta 19.30etarako enparantza gainezka zegoen. Bertan egon dira, besteak beste, Ibai Iriarte Tolosako alkatea eta Joxean Agirre Sortuko Gipuzkoako arduraduna, senide eta lagunez gain.

Lasa eta Zabalaren senideak torturapean hildako gazteen erretratuei begira zirela, txalapartaren soinua zabaldu da lau haizetara. Jendea isilik, adi. Hala, Tolosako Sortuko ordezkari batek hartu du hitza, eta gero bertsolari gazte batek hartu dio txanda.  Ondoren iritsi da ekitaldiko unerik hunkigarriena, bi gazteen amak monolitora gerturatu eta lore sorta bana utzi dutenean. Txalo zaparrada baten artean, «herriak ez du barkatuko» oihuak entzun dira.