28 gazte independentistak «libre» uzteko aldarria Gernikan

Gernikako Astra jendez lepo bete da, hilabete honen bukaeran Madrilen epaituko dituzten 28 gazte independentistak libre nahi dituzela aldarrikatzen duen «herritarron adierazpena» aurkeztu eta konpromisoak hartzea eskatuz.

Elkartasunetik konpromisora igarotzeko aldarria egin dute Gernikako Astran 28 gazte independentisten aurkako epaiketa salatzeko egin duten ekitaldian. Ildo horretan, epaiketak eragindako kostu ekonomikoei aurre egiteko laguntza eskatu dute eta gazteak «libre» uzteko konpromisoak hartzea eskatuz «herritarron adierazpena» aurkeztu dute.

Musikari, aktore eta margolariek parte hartu dute ekitaldian epaiketa politikoen kontrako konpromisoa hartuz. Aldi berean, espetxeratze agindua jaso berri duten gazte deustuarrak ere ekitaldian izan dira. Bi urte eta erdiko espetxe zigorra ezarri diete grebalariei.

Epaiketa irailaren 22an hasiko da Madrilen eta abendurarte luzatuko da Segi erakundeko kidea izatea leporatzen diete. Gogoratu dutenez, ekainean akusazio berberak egotzi zizkieten 40 gazte absolbituak izan ziren.