Bertan behera epaiketa bat Durangon Kepa Manzisidorren atxiloketa dela-eta

Bederatzi lagun epaitu behar zituzten gaur Durangon 2008an Herri Batasunaren 30. urteurrena ospatu behar zenean, Ertzaintzaren debekuaren ostean gertatutako istilu batzuen harira. Kepa Manzisidor abokatuaren atxiloketa dela-eta, bertan behera geratu da, ordea.

Durangon bederatzi lagun ziren gaur epaitzekoak, 2008an Herri Batasunaren 30. urteurrena ospatzera zihoazenean, Ertzaintzak debekatu eta istiluetan parte hartu izana leporatuta. Baina, Kepa Manzisidorren atxiloketa dela-eta bertan behera geratu da.

Hainbat herritarrek babesa adierazi nahi izan diete goizeko lehen ordutik epaitegiaren atarian, nahiz eta azkenean ez den epaiketarik eman. ‘Konponbide garaia da. Jazarpen politikorik ez!’ lemapean azaldu dira. Bertan zen Sortuko Niko Moreno, zeinek azaldu egin duen oraingoz epaiketa atzeratu egingo dela.

Bederatzi herritarrei desobedientzia delituak leporatzen zaizkie, urte beteko espetxe zigor eskariarekin. Haietako batzuentzako eskariak altuagoak dira «autoritatea atentatua» leporatzen zaie-eta.