Gazteak «espainiar Estatuarekin amaitzera» gonbidatu ditu Ernaik

Urriaren 12aren atarian Ernai Gazte Antolakundeak «inposaketa guztiekin amaitzeko» euskal gazteria «espainiar Estatuarekin amaitzera» gonbidatu du. Zentzu honetan, «indar okupatzaileen ikurrak» direnak ikusteaz «nazkatu» egin direla adierazi dute, eta Tuteran zegoen Osborneko zezena erorarazi egin zutela gogoratu.

Astelehenean, urriaren 12an, «ez dugula ospatzeko ezer» azpimarratu du Ernai Gazte Antolakundeak ohar baten bidez, eta horregatik, espainiar Estatuarekin «amaitzera» gonbidatu dute euskal gazteria: «Denok norabide berean bultza eginez gero, inposaketa guztiekin amaituko dugu», adierazi dute.

«Mila aurpegi ditu urte eta mendeetan zehar espainiar Estatuaren aldetik herritarrok jasan dugun inposaketak», gehitu dute. Zentzu honetan, gogoratu egin dute urriaren 12an «errepresioarekin lotuta egon den nazioaren izaera» ospatuko dela. Era berean, «indar okupatzaileak askatasunaren alde egiten duen mugimendu ororekin bukatzeko sortua» izan zela nabarmendu dute.

Hau dela-eta, Tuteran zegoen Osborneko zezena bota egin zutela iragarri dute. «Nazkatu gara zuen mehatxuez, Euskal Herriko paisaietan zuen sinboloak ikusteaz, indar okupatzaileen jazarpena pairatzeaz». Nafarroan geratzen zen azken zezena zen eta «indarkeriaren bidez eraikitako estatu- aparatu guztiak ere erortze bidean» daudela irudikatzeko burutu zuten ekintza.