Euriari eta haizeari aurre egin eta 1.500 pertsona inguru bildu dira Kilometroak Txikian

Irailaren 24an Oñatin ospatuko den Kilometroak egunera begira lehenengo proba egin dute Txantxiku Ikastolako ikasle, irakasle eta gurasoek. Hala, ibilbidearen zati bat izango dena probatu dute 1.500 pertsona inguruk.

Goizeko 11.00etan hasita, irailaren 24ko Kilometroak egunean ibilbidearen parte izango den zati bat egin dute 1.500 lagun inguruk, Txantxiku Ikastolak antolatu egun handira begira lehen proba gaindituz.

Ikastolako arduradunek adierazi dutenez, umeak izan dira protagonista: «Gaur eurak protagonista izatea gura genuen eta lortu dugu». Gustura gelditu dira antolatzaileak goizak eman duenarekin, eguraldiak lagundu ez badie ere oñatiarrei.

Egin duten ibilbidean ez da musikarik falta izan, eta herriko plazan eman zaio amaiera ekimenari. Mokadutxoa jateko aukera ere egon da eta Kilometroetarako arropa erosteko aukera izan dute bertaratuek.

Igande honetako ekitaldia antolatzerako orduan herritarren partetik izan duten laguntza goraipatu dute ikastolako arduradunek, auzolanaren garrantzia azpimarratuz. Zentzu horretan, lanean ondo pasa daitekeela ere nabarmendu dute.