Realaren aurka berdinduta, permanentzia zaildu zaio Oiartzuni (1-1)

Liga amaitzeko bi jardunaldi besterik falta ez direnean, gorengo mailan jarraitzea pixka bat zaildu zaio Oiartzuni etxean, Realaren aurka, irabazteko gai izan ez denez (1-1). Athleticek, bere aldetik, irabazi egin du Rayoren aurka (3-2).

Berebiziko neurketa zuen Oiartzunek igande honetan etxean Realaren aurka. Liga bere amaierara iristen, hiru puntuen beharrean ziren etxekoak azken jardunaldietan permanentziaren lehia beste modu batetara jokatzeko.

Eta behar hori nabarmendu egin da soropilean, lehenengo zatian bertan egin baitute euren gola etxekoek. Bigarrenean, baina, arrisku gehiago sortu dute txuri-urdinek, eta majo sufritu Oiartzunek markagailuan aurretik jarraitzeko. Horretan zirela, azken minutuan lortu du berdinketa Realak, Leyreren gol bati esker.

Gauzak horrela, asko zaildu zaio permanentziaren lehia Oiartzuni eta duten hoberena eman beharko dute geratzen diren azken bi partiduetan Lehenengo Mailan jarraitzerik nahi badute.

Athleticek, berriz, irabazi egin du Lezaman Rayoren aurka, kostata izan bada ere (3-2). Zuri-gorriak aurreratu dira markagailuan 34. minutuan, Damarisen golari esker. Nataliak, baina, gauzak berdindu ditu 65.ean, eta markagailuari buelta eman dio 73.ean.

Hogeiren bat minutu zituen Athleticek neurketari buelta emateko, eta halaxe egin du. 79an binakoa jarri du markagailuan Irune Muruak eta Leiak, penaltiz, amaierako hiru eta bia ezarri du luzapen denboran.

Emakumeen Ligako sailkapen eta emaitzak, NAIZen webgune berezian.