Mikel Zabalza oroitu dute Orbaizetan ehunka lagunek haren heriotzaren 33. urteurrenean
33 urte dira Mikel Zabalza orbaiztarra sufritutako torturen ondorioz Intxaurrondoko kuartelean hil zenetik. Hala, zigorgabetasuna salatu dute haren heriotza oroitu duten ehunka lagunek. Ekitaldian, «ausart» jokatzeko eskatu diote Nafarroako Gobernuari.
Mikel Zabalza orbaiztarra gogoratu dute bere jaiotetxearen atarian haren heriotzaren 33. urteurrenean. Ehunka lagun bildu dira bertan, egia, justizia, erreparazioa eta gertatutakoa berriz ez errepikatzeko aldarrikatzeko.
«Mikel Zabalzarena ez da kasu isolatua, gehiago dira isilpean egiarik, justiziarik eta erreparaziorik gabekoak», adierazi du Eneko Villegasek Mikel Zabalza herri ekimenaren izenean.
Nafarroako Gobernuak polizia indarkeriaren biktimak aitortzeko hasitako bidea gogoan, «ausardiaz» jokatzeko eskatu zaio ekitaldian. 1960-1978 urteen artean izandako biktimez gain, gainerakoak ere ikertzeko eskatu diote.
Zigorgabetasuna salatu dute bereziki ekitaldira gerturatutakoek, batez ere Mikel Zabalzaren auzian inplikatutako guardia zibilek jaso dituzten kondekorazioen harira.
Bertaratutakoen artean ziren, besteak beste, Adolfo Araiz EH Bilduko kidea, Miren Zabaleta Sortukoa, Alvaro Baraibar Nafarroako Gobernuko Bake, Elkarbizitza eta Giza Eskubideen zuzendaria eta Blanca Burusko Nafarroako Gobernuko Elkarbizitza eta Giza Eskubideen zerbitzuko biktimen harretarako burua.