Porrota ezagutu gabe jarraitzen du Realak Imanolekin (0-0)

Majo sufritu behar izan du Realak Mestallatik puntu bat ateratzeko. Gehiago izan dira etxekoak, baina defentsa lan ona egin dute Imanolekin porrota ezagutu gabe jarraitzen duten jokalari txuri-urdinek. [Neurketako xehetasunak]

Bolada onean iritsi dira Valentzia eta Reala gaurko partidura. Pixkanaka, sentsazioak aurkitzen ari dira valentziarrak; donostiarrek, berriz, ez dute porrota ezagutzen Imanolek Asier Garitano ordezkatu eta taldearen ardura hartu zuenetik.

Ongi ekin diote donostiarrek neurketari, lehenengo minutuetan bederen jokoaren kontrola eurena eginez. Baloiaren jabetzan ezaugarritu da batez ere kontrol hori, izan ere, gol aukera garbirik ez du sortu Realak. Halaxe igaro dira lehenengo 45 minutuak; donostiarrak ondo, baloiaren jabe, baina motel erasoko jokaldiak osatzeko orduan.

Bigarren zatia, baina, beste kontu bat izan da. Etxekoek erritmoa handitu dute, eta Rulliren ate ingurura iritsierak pilatzen hasi dira. Zenbait kasutan, gainera, gol aukera garbietan bilakatu dira iritsiera horiek, eta gertu izan du Valentziak 1-0ekoa.

Bereziki izan dira itogarriak neurketako azken minutuak. Raul Navasek zelaia utzi behar izan du lesio bat medio; Zalduak ere arazo fisikoak izan ditu, nahiz eta partidua amaitzea lortu duen; eta Illarramendik esku-ohe batean utzi behar izan du soropila. Ahalegindu da Reala kontraerasora ateratzen, baina kamuts aritu dira gaur txuri-urdinak erasoko lanetan.

9. da orain Reala sailkapen nagusian, Europako postuetatik puntu bakar batera.