Belodromoko jaialdirako lehen 1.000 sarrerak, Gazte Topagunean salgai, 15 eurotan

Gaur abiatu da Lemoan Gazte Topagunea eta bertan, NAIZ Akeita gunean, ekainaren 9an Donostiako Belodromoan GARAren egoerari aurre egiteko antolatuko den musika jaialdiko lehen 1.000 sarrerak jarriko dira salgai, 15 eurotan. Apirilaren 23tik aurrerak, NAIZen bitartez ere eskuratu ahal izango dira sarrerak.

Berri Txarrak, Huntza, Talco, Gatibu, Los Zopilotes Txirriaos, Nogen, La Furia, Itziarren Semeak, Esne Beltza, Hesian, Siroka, Valtònyc eta SA taldeak Donostiako Belodromoan izanen dira ekainaren 9an, GARAk, zorraren ondorioz sortutako egoerari aurre egiteko, antolatutako jaialdian.

Gaur jarriko dira sarrera horiek salgai Lemoan abiatu den Gazte Topagunean. Bertan NAIZek gune bereizi bat izanen du, NAIZ Akeita gunea, eta hor jarriko dira salgai jaialdirako lehen 1.000 sarrerak, 15 euroko prezioan. Sarrera hauek bereganatzen dituztenek, gainera, kamiseta bat izanen dute opari eta NAIZerako hiru hilabeteko harpidetza ere eskuratuko dute.

Lemoara gerturatzerik ez duenarentzako, apirilaren 23an, 12:00etan, jarriko dira salgai gainontzeko sarrerak, 18 eurotan, NAIZen webgunearen bitartez.

Erronka 10.000 harpidetza biltzea da eta, modu horretan, zorrari aurre egiteko epe eta kopuruei erantzuna eman ahal izatea. Bide horretan, boluntario ugari biltzen ari da kanpaina eta ekainaren 9ko jaialdia mugarri bat izanen da. Bertan, bi eszenatokitan, ordu erdi inguruko kontzertuak eskainiko dituzte musika taldeek, eguerdian hasita eta 23:00ak bitarte.