Karmele Jaio, Maialen Lujanbio eta Unai Iturriagaren bertso-saioa
Karmele Jaiok kantuan jarriko ditu Maialen Lujanbio eta Unai Iturriaga asteazken honetan arratsaldean Bilboko Bidabarrietako liburutegiko aretoan, Bertso-Literatura Topaketen barnean. Gasteizko idazlearen mota honetako estraineko saioa izango da.
Bere azken eleberria, ‘Aitaren etxea’ (Elkar), liburu salduenen zerrendaren lehen postuan mantentzen ari da astero. Berriki, 111 Akademiaren saria jaso du; hau da, Akademia osatzen duten kideen iritziz, ‘Aitaren etxea’ izango baita 2019ko libururik onena.
Eta asteazken honetan bertsolaritzaren munduan murgilduko da Karmele Jaio idazle gasteiztarra eskarmentu handiko bi bertsolarien laguntzarekin; Maialen Lujanbio txapelduna eta Unai Iturriaga, alegia.
Bertso-saio literario izenez bataiatu diren saioetan, idazle batek kantuan jarriko ditu bi bertsolari. Kasu honetan Karmele Jaioren aginduetara, bat-batean arituko dira kasuan kasuko bertsolariak. Idazleek pasarte literarioak irakurri ondoren, hari loturiko gaiak proposatuko dizkie bertsolariei.
Hitzordua gaur asteazkenean 19.00tan da, Bilboko Bidebarrieta Liburutegiko aretoan. Sarrerak, 5 eurotan, Bilbao Kulturan eskuratu daitezke. Bertan, akats bategatik, Unai Iturriagaren ordez Unai Elorriaga idazlearen izena aipatzen duen arren.
Ekitaldia Bilbao Uda 2020 egitarauaren barne dago; hau da, Bilboko Udalak koronabirusak ezabatutako uda kulturalari bizigarri pixka bat emateko atondutako ekitaldien barne.
Antolatzaileek diotenez, «hiru autoreren arteko elkarlana izango dira saiook: hiru ahots elkarlanean. Erregistro guztiak lantzeko ahalbidea ematen duen saioa da: umorezkoa, poetikoa, narratiboa, akziozkoa, dialektikoa...Bertso-saio baten ohiko moldeak hautsi gabe (bat batekotasuna, testuingurura egokitzea etab.), literaturaz gozatzeko aukera eskaintzen da».