Euskal gizarteak pertsona guztien eskubideen alde egiten duen lana aitortu du Etxeratek
Euskal gizarteak pertsona guztien eskubideen alde egiten duen lana aitortzeko eta euskal presoen eskubideak aldarrikatzeko giza kateak egin ditu Etxeratek Iruñeko eta Gasteizko parlamentuetan Giza Eskubideen Nazioarteko Egunean.
Gaur, abenduak 10, Giza Eskubideen Nazioarteko Egunaren testuinguruan, Etxeratek giza kateak egin ditu Iruñeko eta Gasteizko parlamentuen aurrean euskal gizarteak pertsona guztien eskubideen alde egiten duen lana aitortzeko eta euskal presoen eskubideak aldarrikatzeko.
Etxeratek, oraindik arrazagatik, erlijioagatik, generoagatik edo politika diskriminatzaile eta sufrimendua eragiten duten politikengatik eskubideak «modu larrian urratzen direla» gogoratu du, eta Giza Eskubideen Nazioarteko Eguna «salaketarako bozgorailu» izan behar dela adierazi du.
Horregatik, aurreko urteetan bezala, preso politikoen senideak, lagunak eta gertukoak «espetxe politika berezitua, salbuespenezkoa eta, funtsean, eskubideak urratzen dituena» salatzeko bildu dira bi erakunde horien aurrean. Dispertsioa familia-bizitzarako, askatasunerako, intimitaterako, duintasunerako, osotasun fisikorako, osasunerako eta bizitzarako eskubidea urratzea dela salatu dute.
«Horren ondorioak ez dira mingarriak soilik, itzulezinak baizik. Dagoeneko 33 urte bete ditu, eta sufrimendua eragin die espetxean dauden pertsonei eta haien senideei, gainera hildakoak ere eragin ditu», gogoratu dute Iruñean eta Gasteizen egindako giza kateetan.
Era berean, OMEk eta nazioarteko beste erakunde batzuek erreklamatutako neurrien aurrean espetxe agintariek duten «inhibizioa» eta kartzeletan ezarritako murrizketen ondorioz izan diren «eskubide urratzeek» preso dauden pertsonei eta haien senideei «oso egoera zaila» eragin dietela adierazi du euskal preso eta iheslari politikoen senide eta lagunen elkarteak: «isolamendua, zailtasun handiagoak, ziurgabetasuna, larritasuna...».
Euskal gizarteari aitormena
Salaketaz aparte, Etxeratek euskal gizarteak pertsona guztien giza eskubideen alde egiten duen lan «nekaezina» aitortzeko ere aprobetxatu du eguna. «Gizartearen, haren agenteen eta erakundeen lan isil baina etengabe horrek interes eta presio politikoetan trabatutako egoera bat desblokeatzea lortu du, eta lan horri esker sakabanatze politika aldatzen ari da», azpimarratu du.