Arrasatek eta Azpeitiak taberna eta jatetxeak ireki ahal izango dituzte astearte honetan

Arrasatek eta Azpeitiak ostalaritza berriz ireki ahal izango dute astearte honetan. Lazkaon itxi egin beharko da, eta beste 7 herritan ere ezingo da ireki, covid-19aren pandemiaren bilakaera dela eta.

Arrasatek eta Azpeitiak taberna eta jatetxeak berriz ireki ahal izango dituzte astearte honetan, urtarrilaren 5ean, azken 14 egunetan koronabirusaren intzidentzia metatua 100.000 biztanleko 500 kasuetatik jaitsi ondoren. Lazkaon itxi egin beharko da, eta beste 7 herritan ere ezingo da ireki.

Lakuako Gobernuko Osasun Publikoaren eta Adikzioen Zuzendaritzak azken 14 egunetan 100.000 biztanleko 500 kasu edo gehiago izateagatik ostalaritza irekitzea debekatzen duten herrien zerrenda eguneratu du astelehen honetan. Ebazpena astearte honetan, abenduaren 5ean, sartuko da indarrean, eta ostegunean berrikusiko dute.

Gipuzkoan, ostalaritza itxita mantendu beharko duten 5.000 biztanletik gorako herriak Aretxabaleta eta Beasain dira, zerrendan sartu den Lazkaoz gain. Bizkaiaren kasuan, Arrigorriagak eta Bermeok ezin izango dituzte beren tabernak ireki.

5.000 biztanletik beherako herrietan debekua mantendu egiten da Ataunen, Eskoriatzan eta Olaberrian.

Araban ez dago 100.000 biztanleko 500 koronabirus kasutik gorako udalerririk.

Zenbait udalerritan ostalaritza etengabe ixtearen ondorioz sektorearen haserrea areagotzen ari da. Arrigorriagako Udalak laguntza gehiago eta gardentasun gehiago eskatu zizkion Lakuari joan den astean. Bertan, hiru aste daramatzate taberna eta jatetxeek ireki gabe.