Sindikatuek EAEn txertaketa aurrera eramateko dagoen «plangintza eskasa» salatu dute
Sindikatuek covidaren aurkako txertaketa aurrera eramateko existitzen den «plangintza eskasa» kritikatu dute. Haien ustez, EAEko Osasun Sailak giza taldeak indartu behar ditu, «baina argi dago Eusko Jaurlaritza ez dagoela oinarrizko zerbitzuetan inbertsioa handitzeko lanean».
Satse, ELA, LAB, CCOO, UGT eta ESK sindikatuek salatu dute covid-19aren aurkako txertaketa aurrera eramateko dagoen «plangintza eskasa». Izan ere, txertaketa-abiadura handiagoa izateko giza taldeak indartu behar direla ohartu dute eta, beraz, inbertsio handiagoa egin behar dela. «Baina argi dago Eusko Jaurlaritza ez dagoela oinarrizko zerbitzuetan inbertsioa handitzeko lanean».
EAEko hiriburuetan manifestazioak egin dituzte sindikatuek, kalitatezko osasun publikoa defendatzeko eta Osakidetzako langileen eskubideak aldarrikatzeko. Mobilizazioetan adierazi dutenez, Osasun Sailak erabaki du nork, noiz eta nola hartu txertoa», eta kritikatu dituzte Josu Erkoreka lehendakari ordeak egindako adierazpenak, izan ere, langileen eskubideak erabili zituelako txertoaren erritmoa justifikatzeko.
Haien ustez onartezina da «Eusko Jaurlaritzari soilik dagokion kudeaketa kamuflatzen saiatzea, plantillaren eskubideen atzean, batez ere kontuan hartzen badugu langileen ahalegina eta inplikazioa dela, hain zuzen ere, osasun-zerbitzu publikoa mantentzen ari dena». «Benetan existitzen dena plangintza eskasa da, oraindik airean dagoena, eta plantillaren indartze-falta, azken hilabeteetan ugaritu egin baita langile horien lana, eta urrundik datorren gainkarga estrukturala baitu», gaineratu dute.
«Beste behin ere, gure aldarrikapenei heltzeko beharra eta premia berretsi nahi dugu: Osasun publikorako aurrekontu-partida bat, EBren batez bestekoarekin parekatuko dena, osasun-aurrekontuaren %25 lehen mailako arretara bideratuz; plantilla handitzea, egiturazko plantillan iruzurrean ezkutatuta dauden enpleguak sartuz; behin-behineko langileak sendotzea; murrizketa guztiak lehengoratzea; pribatizatutako zerbitzuak lehengoratzea; eta neurriak bermatzea Osasunaren eta segurtasunaren bermean», azpimarratu dute.