Bogotako autobus geltokia manifestariak torturatzeko erabili zela salatu dute
Bogotako hainbat zinegotzik torturen eta sexu-abusuen salaketa batzuk jaso zituzten duela aste batzuetako protestetan. Tratu txarrak eta gehiegikeriak Portal Las Americas-eko autobus geltokian gertatzen ziren, eta gizarte-erakundeen arabera, tortura sistematikorako modu berria ziren.
Bogotako hainbat zinegotzik salaketa batzuk jaso zituzten Poliziak ustez egindako torturengatik eta sexu-abusuengatik Portal Las Americas-eko autobus geltokian, Kolonbiako hiriburuko auzo horretan protestek jarraipen handia izan baitute.
Gertaera horiek maiatzaren 3tik 4rako gauean gertatu ziren, TransMilenio garraio masiboko sistema multimodaleko estazio horretan. Bogotako Kontzejuko Giza Eskubideen Jarraipen Batzordeari gertatutakoa salatu zioten gizarte-erakundeek. Geltokiaren barruan oihuak entzun zituzten bizilagunek. «Ziurrenik, ESMADeko (Escuadrón Móvil Antidisturbios) poliziek tratu txar fisiko eta tortura larriak eragin zizkieten», esan dio Efe ajentziari Los Verdes-eko zinegotzi Diego Cancinok.
Zinegotzia bertara joan ondoren, TransMileniora enpresak onartu zuen poliziak gau horretan hamar pertsona atxilotu zituela, bederatzi gizon eta emakume bat, eta zaurituak egon bazirela, nahiz eta ez dakiten «gertaerak instalazioen barruan gertatu ziren».
Telefono mugikorraren bitartez zuzeneko irudiak zabaltzen ari zen gazte bat poliziak atxilo hartu eta geltoki horretako bainu batera eraman zuen. Ondoren, konexioa moztu egin zen, eta gaztea zauriekin eta odolarekin agertu zen toki horretatik, Cancino zinegotziaren arabera.
Zinegotziak esan zuen Whatsapp-en audio bat ere jaso duela, beste gazte batek neska-lagunari bidali ziona, eta han azaltzen dio okerrena ez zela berari eman zioten jipoia, baizik eta bere ondoan sexu-gehiegikeriak jasaten ari ziren nesken garrasiak.
Erakunde sozialek salatu dutenez, Poliziak sexu-gehiegikeriak eragin dizkie manifestariei, tortura sistematiko gisa.
Protestak hasi zirenetik (apirilaren 28an), Fiskaltzaren datuen arabera 20 lagun hil dituzte. 74 dira, ordea, Temblores GKEaren arabera –eta horietatik 45 polizia indarkeriari egozten dizkio–.