Donostia Ospitaleko ZIUan: hurrengo olatu bati ere eusteko prest
Luze doa izurria eta erauntsi bakoitzean kutsatu direnen kopuru nabarmen bat zaintza unitate berezian artatua da. Izan ere, covid-19a ez da kasu guztietan zenbait egunez etxean bakartuta, tratamendua jasota eta atsedenarekin gainditzen. Asko dira 40 egunetik gora pasa dutenak. Barrura sartu gara.
Izurri hau hasi zenetik etengabeko lanean dabiltza Donostia Ospitaleko Zainketa Intentsiboko langileak. Asko ikasi dute unitate honetan txandaka lan egiten duten 300dik gora profesionalek. Kutsatu kopuruen gorakada bakoitzak irakaspen berriak utzi dizkie gaitzaren ondorio, tratamendu eta zaintza lanen inguruan.
ZIU bateko medikuentzat ez da ohikoa gaitz bati baldintza hauetan aurre egitea. Egunerokoan mota askotako pazienteak tratatzen dituzte, hala nola, bihotzekoak jasandakoak, auto istripu batean larri zaurituak, ictus kasuak... Inguru honetan ohikoak ez diren gaitzei aurre egitea ere gerta daiteke, eta, horrelakoetan, bertako profesionalen esperientziaz gain, munduko edozein txokotan beste mediku batzuen dokumentatutako kasuak lagungarriak dira. Baina ez da gaitz honen kasua izan. Bertako zerbitzu buru Felix Zubia medikuak gogoratzen duenez, «hasiera hartan ez genuen inolako bibliografiarik gaitz honen inguruan. Gaur egun gauzak bestelakoak dira. Bibliografia badago eta esperientzi propioa metatu dugu».
Txertaketa kanpainaren emaitzak ere nabari dira. Duela hilabete gutxirekin alderatuz, asko aldatu da hemen artatutakoen profila. Adina nabarmen jaitsi da, eta gaur egun ZIUan daudenetako asko 40 eta 60 urte artekoak dira. Hortik gorako gehienek txertaketa osatua dute. Horrela, gauzak hobera doaz eta maiatza hasi baino lasaiago amaitu dute. Azken asteetan husten joan dira Aste Santuaren bueltan betetzen hasi ziren oheak. Askok 40 egunetik gorako egonaldia egin dute bertan, hori bai. Hala ere, azken olatua aurrekoa baina motelago baretu da.
Alarma egoera bertan behera utzi eta neurriak malgutu zirela zenbait aste pasa diren honetan, ikusteko daude datozen egun eta asteak nolakoak izango diren. Hilabete askotan eginiko lanaren zama agerikoa dela, atseden fisiko zein mentalerako premia sumatzen dute bertako mediku, erizain, erizain laguntzaile, fisioterapeuta, zeladore, garbitzaile eta gaixoak hona ekartzen dituzten anbulantzietako langileek.
Itxaropenak txertoetan jarriak dituzte, jendea inmunizatu ahala ospitaleratzeak jeitsiko direla eta ondorioz gune honetara covid-19aren erasoaren ostean jende gutxiago iritsiko delakoan. Orduan hasiko dira atsedena hartzen. Bestelako gaitzekin lanean segiko badute ere, orduan hartuko dute deskantsu fisikoa, izango dute bizitakoaren gainean hausnartzeko eta buruak hustutzeko tartea ere. Merezi dute.