Polizia alemaniarrak Berlingo Koepi espazioa hustu du 2.000 agente inguru mobilizatuta
30 urtez martxan egon den Berlingo Koepi Platz etxebizitza okupatua hustu zuen Polizia alemaniarrak pasa den ostiralean, 2.000 agente inguru mobilizatu zituen operazio batean.
Urriaren 15ean Polizia alemaniarrak Berlingo Koepi Platz etxebizitza-proiektua desalojatu zuen. Arratsaldeko lehenengo orduetan okupatutako etxebizitzan bizi ziren edo proiektua babestera agertu ziren 37 pertsona atera zituen Poliziak eraikinetik eta haien datuak jaso zituen. Polizia-iturrien arabera, operatiboan 27 pertsona atxilotu zituzten, eraikin inguruan antolatu ziren protestatan parte hartutako pertsona batzuk barne.
Zeinbait ekintzaile desalojoa saihesten saiatu ziren inguruko zuhaitzetara igo eta bertan lotuta. Indar polizialei ohartarazi zieten makinaria sartzen bazuten beraien bizitza arriskuan jarriko zutela, baina muzin egin zieten agenteek eta bortizkeriaz sartu ziren etxera. Makina astunak erabili zituen etxea husteko: metalezko plakak soldatu zituzten sarrera blokeatzeko, bizilagunek ondutako barrikadak erauzi zituzten eta motozerrak eta gas negar-eragilea ere baliatu zituzten.
Laranja Dierschke Poliziaren bozeramailearen arabera, zazpi estatu federaletako 700 langile eta polizia federala Berlinera iritsi ziren bertako operazioan laguntzeko. Dierschke-ren arabera, ia 2.000 funtzionariok hartu zuten parte Köpenicker Strasse eremuan eta Berlingo hiriguneko beste leku garrantzitsu batzuetan.
Desalojoaren aurreko egunetan, egoiliarrek 2.600 metro karratu inguruko espazioa aseguratu zuten, lau metro arteko altuerako hesi batekin eta txarrantxarekin.
Hiru hamarkada luzeko proiektua
Koepi Platz etxebizitza-proiektu bat da, Köpenicker Straße- kalean dago kokatuta, Berlinen. 1990ean okupatu zuten eta 1991n legeztatu, etxebizitza autonomoaren eta zentro sozial autogestionatuaren proiektu gisa.
Eraikineko patioa ibilgailuetan bizi ziren pertsonentzat baliatzen zuten.
Fermin Muguruza musikariak Twitterren jakitera eman duenez, Koepi hainbat euskaldunen aterpe ere izan da azken 30 urteetan.
Berlingo #Kopi , 30 urtez instituzio kultural alternatiboa, eta euskaldun askoren aterpe, 2.000 poliziek desalojatu dute.#Koepibleibt #DefendKoepi #b1510 @AneIrazabal https://t.co/tEDBWcXoym
— Fermin Muguruza (@muguruzafm) October 17, 2021