25 urteko ibilbideari amaiera emango dio Bidasoako Jose Manuel Sierra atezainak

«Erabaki zaila da beti, bizitza guztirako jokatzen jarraitu nahiko nukeelako», adierazi du Sierrak ostiral honetan. «Ondo sentitzen naiz, egunetik egunera hobetzen, baina momentua da, proiekturen bat atera daitekeelako eta jokatzeari uzteko unea delako», gehitu du.

Bi egunen buruan, Bidasoa-Irunek bi jokalariei agur esan behar diela jakinarazi du. Ostegunean Kauldi Odriozola izan zen denboraldiaren amaieran atzerriko talde batera joango dela iragarri zuenak. Eta ostiral honetan Jose Manuel Sierra (Moguer, 1978ko maiatzaren 21a) atezaina izan da erretiroa hartuko duela aitortu duenak.

«Urte asko dira, talde askotan egon naiz, urte askoan, baina batez ere bizi eta jendearekin partekatutako guztiarekin geratzen naiz. Kirolean gauza asko daude: hobetzen saiatzea eta egunero ahalik eta gehien ematea, edo tituluak bilatzea, baina jendearen maitasunarekin geratzen naiz, lankideak, presidenteak, zuzendariak, prentsa, zaleak…», azaldu du atezainak Gurutz Aginagalde presidentearekin batera egindako agerraldian.

Hala, 43 urte dituen atezainak 25 urteko ibilbide profesionalari –35 dira bere herriko taldean iragandako hamar urteak kontuan hartuz gero– amaiera emango dio denboraldiaren amaieran. Talde askotan jokatu du eta Bidasoa izango da bere azken taldea. «Perspektiban, Bidasoa-Irunera etortzeko erabakia oso egokia izan zen. Klub handi bati, familia handi bati, goi mailan jarraitzea Bidasoa bezalako klub handi batean erretiratzea izan da egin ahal izan dudan gauzarik onena», azpimarratu du.

Hori bai, honakoa aitortu du: «Erabaki zaila da beti, bizitza guztirako jokatzen jarraitu nahiko nukeelako. Ondo sentitzen naiz, egunetik egunera hobetzen, baina momentua da, proiekturen bat atera daitekeelako eta jokatzeari uzteko unea delako».

Jose Manuel Sierra Pedro Alonso Niño taldean hasi zen eskubaloian (1986/1996), eta handik profesionaletara igaro zen FC Bartzelonarekin (1996/2000). Ondoren, BM. Valladolid (2000/2003 eta 2004/2012), Ciudad Real (2003/2004), Paris Saint Germain HB (2012/2014), Pick Szeged (2014/2018) eta USM Saran (2018/2020) taldeetan jokatu zuen. Azken bi urteak Irunen eman ditu.

Sierrak aipamen berezia egin nahi izan die gurasoei eta anai-arrebei. Izan ere, «18 urte nituela Moguerretik irten nintzenetik bidaia honetan lagundu eta parte hartzeagatik. Lau urte eman nituen Bartzelonan, bat Adrianenc taldean utzita; etxetik kanpo nengoen eta hirugarren atezaina izateak ez ninduen betetzen. Hainbat aukera nituen eta onena hautatu nuen: Valladolid. Eskerrak eman nahi dizkiot jokalari gisa izan dudan garai onenari, giza talde handi batekin eta Juan Carlos Pastor bezalako entrenatzaile handi bati. Valladolidek garrantzitsuena dena ere eman dit: nire familia. Ordutik, bost hiri bikainek jarraitu zuten nire bidaian: Ciudad Real, Paris, Szeged, Saran eta Irun».

Eta hala izango da. Azken geldialdia Irun da: «Bete-betean asmatu dut hona etortzen, giza talde handi honetaz oso harro bainago. Asko disfrutatzen ari naiz, eta pozten nau klub honetako kide izanda pistei agur esateak. Eskerrak eman nahi dizkiet Gurutzi eta zuzendaritza batzordeari agurrean gidatzeagatik, niretzat zerbait berria zelako. Patua zoragarria da: hasi nintzen klubaren koloreak, Pedro Alonso Niñoren kolore hori eta urdinak, erretiratuko naizen klubaren berdinak dira, Bidasoa».

Palmares itzela

Profesional bezala aritu den 25 urte hauetan guztietan lau Europako Kopa, Europako Errekopa bat, hiru Europako Superkopa, bost Asobal Liga, bost Kopa, hiru Asobal Kopa eta Espainiako hiru Superkopa lortu ditu.

Horien artean, 2013an Espainiarekin jokatutako Munduko Txapelketa bere ibilbideko unerik nabarmenena izan daiteke: «Selekziora joatea ametsa da, domina bat lortzea, beste bat; eta etxean munduko txapeldun izatea da unerik hunkigarriena, Espainiako eskubaloiaren historiaren parte izatea».

Bestalde, Gurutz Aginagalde C.D. Bidasoako presidenteak Sierraren «kalitate profesionala eta giza kalitatea» azpimarratu ditu agerraldian: «Hori oso argi genuen duela bi urte fitxatzea erabaki genuenean. Bere ibilbidea ikaragarria bada, miresgarria da eguneroko hobetze-grina hori ere, filialetik igo berria balitz bezala. Oso adibide ona da, ez edozein kirolarirentzat, baizik eta bizitzaren edozein arlotan», amaitu du.